Foto: ál-Farabi atyndaǵy QazUÝ-dyń Baspasóz qyzmeti
Ál-Farabi atyndaǵy Qazaq ulttyq ýniversitetinde QR eńbek sińirgen qairatkeri, dástúrli ánshi, Jambyl atyndaǵy Qazaq memlekettik akademiialyq filarmoniiasynyń direktory Aqan Ábdýálimen shyǵarmashylyq kezdesý ótti.
Jýrnalistika fakýlteti uiymdastyrǵan kezdesýge oqytýshy-professorlar quramy men bilim alýshy jastar qatysty.
Is-sharany jýrnalistika fakýltetiniń dekany Qanat Áýesbai quttyqtaý sózben ashyp, Aqan Jylqyshybaiulynyń qazaq dástúrli án ónerin nasihattap, damytýǵa qosqan eleýli úlesin atap ótti.
Óz kezeginde QR eńbek sińirgen qairatkeri Aqan Ábdýáli shyǵarmashylyq kezdesý uiymdastyrǵany úshin oqý ordasynyń basshylyǵy men ujymyna rizashylyǵyn jetkizdi.
«Ál-Farabi atyndaǵy Qazaq ulttyq ýniversiteti men úshin erekshe ystyq. Osy bilim ordasynda tálim alǵan talantty tulǵalarmen kóp aralasyp, shapaǵatyn kórdim. Kóshbasshy ýniversitettiń stýdentterimen kezdesý men úshin úlken qýanysh», – dep yqylasyn bildirdi.
Qurmetti qonaq óziniń ónerdegi jolyna toqtalyp, sahnaǵa alǵash shyqqan ýaqyttaryn eske aldy.
«1987 jyly belgili aitysker Orazaly Dosbosynov ekeýmiz eń birinshi aitysqa shyqqanbyz. Boiymyz alasa bolǵandyqtan, oryndyqqa otyrǵanda aiaǵymyz jerge timeitin. Sol ýaqyttan bastap qazaq sahnasynda óner kórsetip kele jatyrmyn. Aitysqa da, kinoǵa da tústim. Án aityp, qissa-dastandardy, jyr-termelerdi jyrladym. Aldaǵy ýaqytta da shyǵarmashylyq baǵytta eńbek ete beremin dep oilaimyn», – dedi Aqan Ábdýáli.
Júzdesý barysynda Aqan Jylqyshybaiuly tanymal jyrshy-termeshilerdiń shyǵarmalaryn, dástúrli ánderdi dombyramen oryndap berdi.
Erkin formatta ótken kezdesýde QazUÝ qonaǵy bilim alýshy jastardyń saýaldaryna jaýap berip, qoǵamdaǵy rýhani tárbie men mádeniet, ónerge qatysty oilaryn ortaǵa saldy.
Shyǵarmashylyq kezdesýden keiin qatysýshylar estelik sýretke túsip, áserlerimen bólisti.
Qaragóz Serikqyzy,
ál-Farabi atyndaǵy QazUÝ, Baspagerlik, redaktorlyq jáne
dizainerlik óner kafedrasynyń oqytýshysy
