Foto: Qazaqstandaǵy Qytai elshiligi
4 aqpanda Astanada Qytai Halyq Respýblikasynyń Qazaqstan Respýblikasyndaǵy Elshiligi Qytai Jańa jyly qarsańynda saltanatty qabyldaý uiymdastyrdy. Sondai-aq «Sálem, Qytai!» Jibek jolynyń kóktemgi áýeni» atty Qytai týrizmin nasihattaý is-sharasyn ótkizdi. Bul týraly Ult.kz habarlaidy.
4 aqpan Qytaidyń jiyrma tórt maýsymdyq kezeńiniń bastaýy - Lichýn kúni. Kóktemniń bastaýy - tirshiliktiń jańǵyrýyn, úmit pen jer qoinaýyn jaryp shyqqan jasampaz kúshti boiyna sińirse, Jańa jyl Kóktem merkesi-qaýyshý qýanyshyn, shattyq pen ótkendi sabaqtastyra otyryp, bolashaqqa bet túzegen jańa bastamalarǵa degen senimdi aishyqtaidy.
Qytai Halyq Respýblikasynyń Qazaqstan Respýblikasyndaǵy Tótenshe jáne Ókiletti Elshisi Han Chýnlinniń aitýynsha osy Lichýnniń «Chýn» sózi men Jańa jyldyń «Jańarý» máni bizge Qytai men Qazaqstan arasyndaǵy qarym-qatynastyń keleshek baǵytyn aiqyn kórsetkendei. Bul-dástúrli dostyqty berik negiz ete otyryp, jańashyldyqqa jol ashý arqyly eki el arasyndaǵy yntymaqtastyqty sapalyq jańa deńgeige barynsha kóterý.
Foto: Qazaqstandaǵy Qytai elshiligi
Elshi myrza óz sózinde Qytai men Qazaqstan arasyndaǵy strategiialyq seriktestik sońǵy kezeńde aitarlyqtai nyǵaiyp, joǵary deńgeidegi ózara saparlar men sammitter arqyly saiasi senim tereńdegenin, eki el halyqaralyq jáne óńirlik máselelerde bir-biriniń negizgi ulttyq múddelerin qoldap, BUU men kópjaqty uiymdar aiasyndaǵy yntymaqtastyqty kúsheitip otyrǵanyn sózge tiek etti. Sondai-aq saýda-ekonomikalyq bailanystar qarqyndy damyp, taýar ainalymy rekordtyq deńgeige jetkenin, logistika, energetika, infraqurylym jáne jańa tehnologiialar salalarynda naqty nátijeler baiqalǵanyna da basa nazar aýdardy. Sonymen qatar mádeniet, bilim, týrizm jáne jastar almasýy jandanyp, vizasyz rejim men «týrizm jyldary» gýmanitarlyq bailanystardy jańa deńgeige kóterdi dep esepteidi Han Chýnlin myrza.
"Kóktem merekesi -beibitshilik pen kelisimdi, tatýlyq pen úilesimdi dáripteitin qytai órkenietiniń tereń filosofiiasyn boiyna sińirgen ulyq meiram. Qytai halqy osy merekeniń mádeni shýaǵyn álem jurtshylyǵymen bólisýge ázir, adamzat órkenietiniń san alýandyǵyna jańa serpin qosýdy maqsat etedi", - dedi elshi qonaqtarǵa.
Sonymen qatar onyń aitýynsha elshilik budan bylai da altyn kópir retindegi rólin atqaryp, eki eldiń mádeniet pen týrizm salalaryndaǵy ózara yqpaldastyǵyn tereńdetýge jan-jaqty qoldaý kórsetetin bolady.
"Qytai men Qazaqstan halyqtary osyndai tyǵyz qarym-qatynas pen ózara saparlar arqyly ózara túsinistik pen shynaiy dostyqty nyǵaita túsetinine kámil senemiz. Qytai–Qazaqstan qatynastary mol serpinmen «shapqylai bersin»! Eki el arasyndaǵy barlyq salaaralyq yntymaqtastyq serpin tulpardai «júiitkei bersin»! Barshańyzǵa ár isterińiz ońynan týyp, bastamalaryńyz «sátimen bolsyn»!" - dep aq tilegin jaýdyrdy ol.
Qazaqstan Respýblikasynyń Mádeniet jáne aqparat vitse-ministri Aibek Sydyqov kóktem merekesine qonaq bolǵanyna alǵys bildirip, jyly lebizimen bólisti. Ol óz sózinde kóktem merekesiniń Qytai mádenietindegi mańyzy, onyń halyqtardy jaqyndastyratyn qundylyqtaryn atap ótti. Qazaqstan men Qytai arasyndaǵy joǵary deńgeidegi saiasi dialog pen máńgilik strategiialyq áriptestiktiń nyǵaiǵany, ásirese mádeniet salasyndaǵy yntymaqtastyqtyń róli erekshe kórsetiledi dedi.
Foto: Ult.kz
Vitse-ministrdiń sózinshe eki elde mádeni ortalyqtardyń ashylýy jáne 2026 jyldyń Qazaqstan men Qytaidyń Mádenietiniń ózara jyly dep jariialanýy mańyzdy qadam. Sondai-aq Qytai Jańa jylyna arnalǵan birlesken mádeni is-sharalar josparlanǵanyn aityp, bul bastamalar eki halyqtyń dostyǵy men ózara túsinistigin odan ári tereńdetýge baǵyttalǵanyn jetkizdi.
"Joǵary deńgeidegi qarqyndy ári mazmundy saiasi dialogtyń arqasynda memleketterimiz arasyndaǵy máńgilik strategiialyq áriptestik buryn-sońdy bolmaǵan jańa damý men ózara túsinistik kókjiegine kóterildi. Osy oraida mádeniet salasyndaǵy yntymaqtastyqtyń orny airyqsha. Eki el arasyndaǵy mádeni ózara is-qimyl serpindi damyp, mýzykalyq jáne teatr óneri salalaryndaǵy festivalder, konferentsiialar, forýmdar, baiqaýlar, mýzeilik kórmeler men ózge de kóptegen is-sharalar turaqty túrde ótkizilip keledi.
Sondai-aq, elderimizdiń mádeni ortalyqtar ashý jónindegi ýaǵdalastyqtaryn erekshe atap ótkim keledi. Ótken jyldyń qyrkúiek aiynda Beijiń qalasynda Qazaqstannyń Mádeni ortalyǵy ashyldy. Osy múmkindikti paidalana otyryp, Astanada Qytaidyń Mádeni ortalyǵyn ashý qarsańynda jan-jaqty qoldaý kórsetýge daiyn ekenimdi bildiremin. Bul eki ortalyq halyqtarymyzdyń rýhani jaqyndasýyna yqpal etetin mańyzdy ári suranysqa ie alańdarǵa ainalatynyna senimdimin. Sonymen qatar, 2026 jyl Qazaqstan men Qytaidyń Mádenietiniń ózara jyly dep jariialanǵanyn erekshe atap ótkim keledi. Osy jyldyń aiasynda eki elde de halyqtarymyz arasyndaǵy ózara túsinistik pen dostyqty odan ári nyǵaitýǵa baǵyttalǵan mazmundy mádeni is-sharalar baǵdarlamasy júzege asyrylmaq", - dedi Aibek Sydyqov.
Keshte qonaqtar batpyraýyq jasaý, qanttan órnek salý, qaǵaz qiiý sekildi qytaidyń qoinaýy tereń mádeni muralarymen jaqynnan tanysyp, ulttyq taǵamdarynan dám tatty jáne týristik tanystyrylym keshi ótti.
Atalǵan is-shara Qytai men Qazaqstan arasyndaǵy mádeni-gýmanitarlyq bailanystardyń qarqyndy damyp kele jatqanyn aiqyn kórsetti. Kóktem merekesi aiasyndaǵy qabyldaý men is-sharalar eki halyqtyń ózara túsinistigi men dostyǵyn nyǵaitýǵa, mádeni yntymaqtastyqqa jańa serpin berdi. Taraptar aldaǵy ýaqytta da mádeniet pen týrizm salasyndaǵy áriptestikti tereńdetýge daiyn ekenin bildirdi.
Foto: Ult.kz
Foto: Ult.kz
Foto: Ult.kz
