Almaty ákimi Darhan Satybaldy Eýropalyq qaita qurý jáne damý bankiniń (EQDB) prezidenti Odil Reno-Bassomen kezdesti. Taraptar birlesken jobalardy júzege asyrý jáne qala infraqurylymy, kólik, energetika, tsifrlandyrý salalaryndaǵy yntymaqtastyqtyń keleshegin talqylady.
EQDB basshysynyń Qazaqstanǵa sapary Qazaqstan Respýblikasy Prezidenti janyndaǵy Sheteldik investorlar keńesiniń 38-plenarlyq otyrysy aiasynda ótip jatyr.
Darhan Satybaldy EQDB-nyń Qazaqstanmen yntymaqtastyǵy bastalǵaly beri eldiń damýyna qosqan úlesin joǵary baǵalady.
«Almaty – elimizdiń eń iri ekonomikalyq ortalyǵy ári Qazaqstan damýynyń negizgi qozǵaýshy kúshteriniń biri. Búginde qala respýblika ekonomikasynyń shamamen tórtten bir bóligin qalyptastyryp, jetekshi iskerlik ári investitsiialyq ortalyq mártebesin saqtap otyr. Biz úshin halyqaralyq seriktestermen qarjylandyrý baǵytynda ǵana emes, sonymen birge olardyń zamanaýi qalalyq sheshimderdi engizýdegi tájiribesin paidalaný turǵysynan da yntymaqtastyqty damytý mańyzdy», – dedi Almaty ákimi.
Kezdesýdiń negizgi taqyryptarynyń biri – EQDB, Qazaqstannyń damý banki jáne Aziia damý banki qoldaýymen júzege asyrylyp jatqan Almatydaǵy 2-JEO-yn jańǵyrtý jobasy boldy.
Sonymen qatar taraptar Almaty halyqaralyq áýejaiyn damytýǵa baǵyttalǵan birlesken jobalardy, onyń ishinde jańa jolaýshylar terminalyn salý, sondai-aq Úlken Almaty ainalma avtomobil joly (ÚAAAJ) jobasyn talqylady.
Kezdesýde turaqty damý máselesine de erekshe mán berildi. Almaty EQDB-nyń Green Cities bastamasyna qosylǵan Ortalyq Aziiadaǵy alǵashqy shahar. Taraptar qala infraqurylymyn jańǵyrtý, relsti kólik júiesin damytý jáne jańa infraqurylymdyq jobalardy júzege asyrý úshin «jasyl» qarjylandyrý tetikterin paidalaný baǵytyndaǵy yntymaqtastyqty odan ári jalǵastyrý jaiyn qarastyrdy.
