Foto: ál-Farabi atyndaǵy QazUÝ-dyń Baspasóz qyzmeti
Qazaqstan Respýblikasy Memlekettik qyzmet isteri agenttiginiń tóraǵasy Darhan Jazyqbai Ál-Farabi atyndaǵy Qazaq ulttyq ýniversitetiniń bilim alýshy jastarymen kezdesti.
Júzdesýge oqý ordasynyń stýdentteri, jas memlekettik qyzmetshiler mektebiniń tyńdaýshylary men óńirlik kadr rezervi músheleri qatysty.
Darhan Medeǵaliuly memlekettik qyzmetti jańǵyrtýǵa qatysty Memleket basshysy alǵa qoiǵan mindetterdi júzege asyrý aiasynda atqarylyp jatqan is-sharalar jaiynda aitty. Agenttik tóraǵasy otandyq memlekettik qyzmetti damytýdyń 2024-2029 jyldarǵa arnalǵan tujyrymdamasy qabyldanyp, onyń qoldanystaǵy júieni zaman talaptaryna sai jetildirýge baǵyttalǵanyn jetkizdi.
«Jýyrda Prezident jarlyǵymen Qazaqstan Respýblikasynyń memlekettik qyzmetin damytýdyń 2024-2029 jyldarǵa arnalǵan tujyrymdamasy qabyldandy. Tujyrymdamany iske asyrý aiasynda Japoniia men Singapýr tájiribesine súienip, jastardy memlekettik organdarǵa tartý úshin mektep jáne ýniversitet deńgeiin qamtityn erte kásiptik baǵdarlaý institýty qurylady. Bul daryndy jastardy mektep jasynan bastap yntalandyrýǵa múmkindik beredi. Qatysýshylardy irikteý kezinde olardyń joǵary akademiialyq oqý úlgerimi, qoǵamdyq ómirge belsendi qatysýy eskeriledi», – dedi Darhan Jazyqbai.
Sondai-aq spiker jastardyń memlekettik qyzmetke ornalasýy úshin bilimnen bólek, ádep qundylyqtaryn jáne joǵary mádenietti boilaryna sińirýleri qajet ekenin basa aitty.
«Sapaly kadrdy eshkim syrttan ákelip bermeidi. Olar qoǵamnyń ishinde. Biz sapaly kadrdy taýyp, memlekettik apparatqa tartyp, iriktep alý arqyly kásibi memlekettik qyzmetkerlerdiń jańa legin qalyptastyrýdy kózdeimiz. Memleket basshysy Qasym-Jomart Toqaev: «Ádiletti Qazaqstan» jáne «Adal azamat» uǵymdary egiz qundylyq retinde árdaiym qatar júrýge tiis. Adal azamatqa tán qasietter árbir jastyń boiynan tabylýy kerek», – degen bolatyn. Osy oraida, adal azamat ádiletti Qazaqstannyń qozǵaýshy kúshi», – dedi Darhan Medeǵaliuly.
Jastarmen kezdesýde memlekettik qyzmettiń el igiligi úshin qyzmet etýdi maqsat tutatyny, jeke bastyń múddesi emes, eldiń damýyna úles qosý kerektigi aityldy. Jastar memlekettik qyzmetke ornalasýdy barynsha jeńildetý boiynsha engizilgen jańashyldyqtarǵa qyzyǵýshylyq tanytyp, óz pikirlerin ortaǵa saldy.
Kezdesý sońynda MQIA tóraǵasy «Ádiletti Qazaqstan – adal azamat memlekettik qyzmetshilerdiń kásibi tulǵalyq bolmysy» atty kitabyn Farabi kitaphanasynyń qoryna tabys etti.
Qaragóz Serikqyzy,
ál-Farabi atyndaǵy QazUÝ, Baspagerlik, redaktorlyq jáne
dizainerlik óner kafedrasynyń oqytýshysy
