Jylytý maýsymy kezinde qaýipsizdik sharalaryn saqtamaý saldarynan halyq gazdan ýlanyp, jeke sektorda órt oqiǵalary tirkelip jatady. Sala mamandary «órt qaýipsizdiginiń qarapaiym erejelerin saqtamaý qaiǵyly oqiǵalar týdyrýy múmkin» dep qabyl qaǵady. Jylytý maýsymy kezindegi órt qaýipsizdigi týraly Túrkistan oblysynyń ákimi Darhan Satybaldynyń tóraǵalyǵymen ótken májilis otyrysynda baiandaldy. Onda aldyn alý sharalaryn barlyq quzyrly organ ókilderi jumyla júrgizýge tiis ekeni aityldy.
«Órt qaýipsizdigine qatysty túsindirme jumystary úzdiksiz júrgizilgeni jón. Sapasyz peshter máselesi de ózekti. Túrkistandaǵy jańadan paidalanýǵa berilgen kópqabatty úilerdi de aralap, turǵyndaryna qaýipsizdik sharalaryn túsindirińizder. Aýyldy eldi mekenderde de turǵyndar gaz peshin jańadan ornatyp, ony durys qosa almaýy múmkin. Jylytý maýsymyndaǵy qaýipsizdik máselesi qatań baqylaýda bolady», – dedi Darhan Satybaldy.
Oblys aýmaǵynda jylytý maýsymyna orai turǵyn úilerdegi gaz qoldaný, órt qaýipsizdigin saqtaý erejeleri boiynsha túsindirme jumystary júrgizilýde. Peshpen jáne ruqsat etilmegen peshterdiń kómegimen jylynatyn jeke úilerdegi jaǵdai – basty nazarda. Tótenshe jaǵdailar departamenti arqyly jyl basynan 257 407 (376 227 esepke alynǵan) jeke turǵyn úi aralanyp órt qaýipsizdigine qatysty úgit-nasihat jumystary júrgizilgen. 430774 kemshilik anyqtaldy. 1 mln. 203 myń 286 turǵynǵa nusqama berildi.
Jylytý maýsymynda órttiń aldyn alý ýly gazdan ýlanýdyń aldyn alý maqsatynda mamandar gazosignalizator qondyrǵylaryn ornatýdy usynady.
