Túrkistan qalasynda 110 kV soltústik qosalqy stantsiiasy salynyp jatyr, dep habarlaidy «Ult aqparat» oblys ákimdiginiń baspasóz qyzmetine silteme jasap.
Qurylys tolyq aiaqtalǵannan keiin Túrkistan qalasynyń indýstrialdy aimaǵynda ornalasqan shaǵyn jáne orta biznes nysandary men qosa, qalanyń «Bekzat», «Birlik» móltek aýdandary jáne jaqyn mańda ornalasqan Saýran aýdanynyń Teke, Nurtas eldi meken turǵyndary, áleýmettik, shaǵyn biznes nysandary sapaly, turaqty elektr qýatymen qamtylady. Túrkistan oblysynyń ákimi Darhan Satybaldy búgin qurylys alańynda bolyp, jumysshylarmen kezdesti. Jaýapty basshylarǵa qurylysty sapaly júrgizýdi tapsyrdy.
Búginde qosalqy stantsiianyń ishki jumystary júrgizilýde. Týra bir jyl buryn bastalǵan qurylys jumystaryn keler jyldyń maýsym aiynda aiaqtaý josparlanǵan. Respýblikalyq jáne oblystyq biýdjetten 6 mlrd. teńgeden astam qarajat qaralǵan.
«Túrkistan oblysy jáne osyndaǵy indýstrialdy aimaqtar úshin elektr qýatynyń mańyzy zor. Qýat kózderin arttyrý, sapaly elektrmen qamtý ózekti másele bolyp tur. Sondyqtan bul stantsiianyń qurylys ýaqtyly aiaqtalýy tiis. Áli de mundai jobalardy kóbeitý jolyn qarastyramyz. Óndiristi, kásipkerlikti damytamyz desek qýat kózderi men infraqurylym saqadai-sai bolýǵa tiis», – dedi Darhan Satybaldy.
Óńir basshysy Saýran aýdanyndaǵy jihaz tsehynda boldy. 200 adamdy turaqty jumyspen qamtyp otyrǵan kásiporyn jylyna 2500 dana jihaz shyǵarady. Kásiporyn jumysyn keńeitý úshin memleketten jeńildetilgen nesie alyp, jumys kúshi eki ese artpaq.
Saýran aýdany alyp qurylys alańyna ainaldy. Aýdan ortalyǵy Shornaq eldi mekeninen 38 ga jer bólinip, memlekettik organdardyń 5 ákimshilik ǵimaraty boi kóterdi. Onda aýdan ákimi apparaty ǵimaraty, aýmaqtyq qazynalyq mekemesi, prokýratýra, sot, aýdandyq memlekettik mekemeleriniń ǵimarattary jáne mádeniet úii ornalasady. Buǵan respýblikalyq jáne oblystyq biýdjetten qarajat bólindi.
«Saýran aýdanyn damytý baǵytyndaǵy jumystar júieli túrde jalǵasýy kerek. Ákimshilik ǵimarattary men osy aýmaqtaǵy nysandardyń sáýleti bir-birin tolyqtyryp turýy qajet», – degen Darhan Satybaldy Saýran aýdanynyń ákimi Ǵani Rysbekovke tapsyrmalar berdi. Merdigerlermen pikir almasyp, usynystaryn tyńdady. Jaýapty basqarma basshylarynan aýdandaǵy nysandardy qarjylandyrý boiynsha oilaryn tyńdap, máselelerdi talqylady.
Jergilikti biýdjet esebinen 3 mekteptiń qurylysyna 1 mlrd. teńge qaraldy. Shornaq aýyl okrýgi, Qosmezgil eldi mekenindegi 300 oryndyq mekteptiń qurylysy aiaqtalyp, biyl paidalanýǵa beriledi. Bilim uialary Oranǵai men Ibata eldi mekeninde salynyp jatyr.
Aýdan ortalyǵyn aýyz sý júielerimen qamtý jumystaryna Ulttyq qordan qarajat bólindi. Nysandar jyl qorytyndysymen paidalanýǵa beriledi. «Aýyl – El besigi» jobasy aiasynda 2 eldi mekende 7 joba iske asyrylýda. Budan bólek Saýran aýdanyn abattandyrýǵa, jelilik saiabaq pen balalar alańy men fýtbol alańshasyn salýǵa 530 mln. teńge qaraldy. Avtomobil joldary kúrdeli jóndeýden ótip jatyr.
