Elimizde «Halyq únine qulaq asatyn memleket» tujyrymdamasyn iske asyrý sheńberinde ótinishterdi qaraýdyń jańa formatyn qalyptastyrý boiynsha jumystar jalǵasyp jatyr. Memleket basshysynyń «Ákimderdiń halyqpen kezdesýlerin ótkizý týraly» Jarlyǵyna sáikes, oblys, respýblikalyq mańyzy bar qala ákimderi jarty jylda bir ret, aýdan, qala ákimderi ár toqsan saiyn óńir turǵyndarymen kezdesip, kezdesýden keiin turǵyndardy jeke qabyldap keledi. Halyqpen kezdesýde kóterilgen máseleler men aitylǵan usynystardyń oryndalýy qatań baqylaýda. Oblys ákimi Darhan Satybaldynyń tóraǵalyǵymen ótken májiliste osy baǵyttaǵy jumystar men josparlar talqylandy.
«Aýdandar men qalalardy aralaý barysynda turǵyndar túrli máselelerdi kóterdi. Birinshi kezekte sol ótinishter nazarǵa alynyp, jumys júrgiziledi. Degenmen oblysta infraqurylymdy damytý, qurylys boiynsha negizgi baǵyttardy júielep, sol jospar boiynsha jumys istegen jón. Árbir aýdan, qala ákimdikteri men jaýapty basqarmalar óz quzireti sheńberinde eldiń talap-tilegin qanaǵattandyrý jolynda tiianaqty is atqarýǵa tiis», – dedi Darhan Satybaldy.
Oblys ákimi apparaty basshysy orynbasary Rabiǵa Djeksembaevanyń aitýynsha, aýdan, qalalarda ótkizilgen jeke qabyldaýlarda turǵyndar tarapynan jer qatynastary (42 nemese 10,6%), turǵyn úi (39 nemese 9,8%), aýyl sharýashylyǵy (38 nemese 9,5%), bilim berý (25 nemese 6,3%), infraqurylym (tabiǵi gaz, aýyz sý, elektr jaryǵy) máselesi (24 nemese 6%) jii kóterilgen. Jalpy jeke qabyldaýlar barysynda 400-ge jýyq tapsyrma berilip, basym bóligi oryndalǵan. Birqatary oryndalý ústinde.
Oblys ákimi apparatynyń uiymdastyrý-inspektorlyq jumys jáne aýmaqtyq damý bólimi Madiiar Alipov turǵyndarmen kezdesýlerde kóterilgen tapsyrmalardyń oryndalýy baqylaýǵa alynǵanyn jetkizdi. Turǵyndar tilge tiek etken máselelerdiń 170-i is-shara josparyna engizilip, basym bóligi sheshimin taýyp keledi.
