Túrkistan oblysynyń ákimi Darhan Satybaldy «Halyq únine qulaq asatyn memleket» tujyrymdamasyna sai Ordabasy aýdanyna baryp, turǵyndarmen kezdesti, dep habarlaidy «Ult aqparat» oblys ákimdiginiń baspasóz qyzmetine silteme jasap.
Erkin pikir almasyp, ótinishterin tyńdap, suraqtaryna jaýap berdi. Ordabasy aýdanyn damytý baǵytyndaǵy jumystardy baiandap, josparlarǵa toqtaldy.
«Aýdan, qala turǵyndarymen biylǵy kezdesýim Ordabasy aýdanynda túiindelip otyr. Megapoliske jaqyn ornalasqan ári tranzittik áleýeti joǵary Ordabasy aýdanynyń bolashaǵy jarqyn bolady dep senemin. Oǵan barlyq alǵysharttar bar. Ásirese kásipkerlik pen indýstrialdy aimaqtardy damytýǵa múmkindigi mol. Ordabasy aýdanynyń infraqurylymy jaqsara túsedi. «Aýyl – El besigi» jobasy aiasynda 2022 jyly 18 eldi mekende 22 joba iske asyrylýda. Qyzyljar, Kóltoǵan, Tórearyq, Yqylas Temir jáne Derbes eldi mekenderinde 5 feldsherlik-akýsherlik pýnktiń qurylysyna respýblikalyq biýdjetten qarjy qaraldy Qurylysy 2023 jyly aiaqtalady. 14 eldi mekendegi 47,2 shaqyrym bolatyn 20 kóshege qarjy qaralyp, asfalt tóseý jumystary júrgizilip jatyr», – degen Darhan Satybaldy aldymen eń ózekti máseleler – gaz, aýyz sý, elektr tartý jáne jol salýǵa basymdyq beriletinin jetkizdi.
Kezdesý barysynda turǵyndar tarapynan Qajymuqan Muńaitpasov atyndaǵy sporttyq-mádeni keshenniń qurylysyn aiaqtaý, Shubar aýylynyń ishki kóshelerin retteý, kanaldardy jóndeý, aýyz sý júiesin retteý, meditsinalyq mekeme ashý jáne ózge de máseleler kóterildi. Jeke kezdesýde de áleýmettik jáne jeke túitkilder tarqatyldy. Biryńǵai qabyldaýda óńirdegi quqyq qorǵaý organdary men departament basshylary da turǵyndardyń talap-tilekterin tyńdady. Oblys ákimi árbir aryz-shaǵym, ótinish boiynsha jumys júretinin aityp, jaýapty basshylarǵa naqty tapsyrmalar berdi.
Ordabasy aýdanynda «Jaily mektep» jobasy sheńberinde jańadan 5 mekteptiń qurylysy josparlanýda. Injenerlik-infraqurylym júiesin damytý úshin aýdanda 47 biýdjettik investitsiialyq joba júzege asyrylýda. Temirlan kentindegi 70,0 ga aýmaqta injenerlik-kommýnikatsiialyq jeliler salý qurylysy júrgizilip jatyr. Badam aýyl okrýgindegi indýstrialdy aimaǵyna jáne basqa da óndiristik obektilerge infraqurylym salý qurylysy qolǵa alynǵan. Halyqtyń tabysyn arttyrý maqsatynda
«Túrkistan oblysy boiynsha jumyspen qamtý kartasy» bekitilip, 2022 jyly Ordabasy aýdany boiynsha 2 jarym myńǵa jýyq jumys oryndaryn ashý josparlandy. Qazirgi tańda 2400-den astam jańa jumys orny ashyldy. «Eńbek» baǵyty aiasynda aýdan boiynsha 10 aidyń qorytyndysymen 6 myńǵa jýyq adam jumyspen qamtyldy. Sonymen qatar Memleket basshysynyń «10 myń turǵynǵa 100 turaqty jumys oryndaryn ashý» jónindegi tapsyrmasyna sáikes, aýdannyn ekonomikalyq belsendi halyq sanyna qarai 611 jańa jumys ornyn ashý josparlanyp, 1345 jumys orny ashyldy.
