Túrkistan oblysynda qurylysy uzaqqa sozylǵan mektepterge jaýapty merdigerlermen kelisimshart buzyldy. Olar Jetisai, Otyrar jáne Qazyǵurt aýdandarynda ornalasqan. Búgingi tańda jobalyq-smetalyq qujat túzetilip, saraptamanyń oń qorytyndysy alynǵannan keiin, merdiger mekemeni anyqtap, qurylys jumystary jalǵasatyn bolady. Túrkistan oblysynda biyl 59 mekteptiń qurylys jumystaryn júrgizýge 20,7 mlrd. teńge qarjy qaralǵan. Jyl sońyna deiin 59 mekteptiń 21-in paidalanýǵa berý josparlanǵan.
Budan bylai jumysyna jaýapsyz qaraǵan josyqsyz merdigerlermen jumys jalǵaspaidy. Olardyń óz mindetin qalai oryndaǵany saralanyp, qyraǵy qadaǵalaýda bolady. Túrkistan oblysynyń ákimi Darhan Satybaldy osy laýazymǵa taǵaiyndalǵannan keiingi alǵashqy aptalyq apparat otyrysyn ótkizip, bilim nysandarynyń qurylysyn muqiiat baqylaýdy tapsyrdy. Olardyń sapasyna qadaǵalaýdy kúsheitýdi júktedi.
«Qurylysy kesteden qalyp qoiǵan mektepterdi qaita tekserý kerek. Ýaqytynda tapsyrylmai, qurylysy qysqa deiin sozylatyn nysandardyń sapaly shyǵatynyna kúmánim bar. Sondyqtan jaýapty basqarma basshylary bilim uialarynyń qurylys barysyn qaita qarap shyqsyn. Mektepterge kúrdeli jóndeý jumystary da óz merziminde aiaqtalýy tiis. Qarjyǵa der kezinde usynys berý, jumys barysyn, merdigerdiń jumysyn qadaǵalaý – mindetterińiz. Óńirde oqýshylardyń alańsyz bilim alýyna jaǵdai jasalýy qajet. Bul baǵytta jumys jalǵasa beredi», – dedi oblys ákimi.
Oblys ákimi óńirdegi mektepterdiń qurylys jumystarynyń merziminde aiaqtalýyn qamtamasyz etýdi, qurylys jumystarynyń sapasyn qatań baqylaýda ustaýdy, kemshilikterdi joiyp, bilim salasyna qatysty qordalanǵan máselelerdi sheshý úshin kezeń-kezeńimen is-sharalar josparyn bekitýdi tapsyrdy. Basqarmalar ózara keńesip, keibir máselelerdi ortaq úilestirý kerek ekenin atap ótti. Atalǵan jumystarǵa jaýapty basqarma basshylary men aýdan, qala ákimderiniń tikelei jaýapty ekeni eskertti. Kúrdeli jóndeýden ótip jatqan metepterge qatysty birqatar naqty tapsyrmalar berdi. Qurylystyń oqý protsesine kedergi keltirmeýin eskertti. Oblysta 32 mektepti kúrdeli jóndeýden ótkizý úshin jalpy 4 mlrd. teńgeden astam qarajat qaralǵan. Jyl sońyna deiin olardyń jartysy tolyq jóndeýden ótedi.
