تٷركٸستان وبلىسىندا قۇرىلىسى ۇزاققا سوزىلعان مەكتەپتەرگە جاۋاپتى مەردٸگەرلەرمەن كەلٸسٸمشارت بۇزىلدى. ولار جەتٸساي, وتىرار جەنە قازىعۇرت اۋداندارىندا ورنالاسقان. بٷگٸنگٸ تاڭدا جوبالىق-سمەتالىق قۇجات تٷزەتٸلٸپ, ساراپتامانىڭ وڭ قورىتىندىسى الىنعاننان كەيٸن, مەردٸگەر مەكەمەنٸ انىقتاپ, قۇرىلىس جۇمىستارى جالعاساتىن بولادى. تٷركٸستان وبلىسىندا بيىل 59 مەكتەپتٸڭ قۇرىلىس جۇمىستارىن جٷرگٸزۋگە 20,7 ملرد. تەڭگە قارجى قارالعان. جىل سوڭىنا دەيٸن 59 مەكتەپتٸڭ 21-ٸن پايدالانۋعا بەرۋ جوسپارلانعان.
بۇدان بىلاي جۇمىسىنا جاۋاپسىز قاراعان جوسىقسىز مەردٸگەرلەرمەن جۇمىس جالعاسپايدى. ولاردىڭ ٶز مٸندەتٸن قالاي ورىنداعانى سارالانىپ, قىراعى قاداعالاۋدا بولادى. تٷركٸستان وبلىسىنىڭ ەكٸمٸ دارحان ساتىبالدى وسى لاۋازىمعا تاعايىندالعاننان كەيٸنگٸ العاشقى اپتالىق اپپارات وتىرىسىن ٶتكٸزٸپ, بٸلٸم نىساندارىنىڭ قۇرىلىسىن مۇقييات باقىلاۋدى تاپسىردى. ولاردىڭ ساپاسىنا قاداعالاۋدى كٷشەيتۋدٸ جٷكتەدٸ.
«قۇرىلىسى كەستەدەن قالىپ قويعان مەكتەپتەردٸ قايتا تەكسەرۋ كەرەك. ۋاقىتىندا تاپسىرىلماي, قۇرىلىسى قىسقا دەيٸن سوزىلاتىن نىسانداردىڭ ساپالى شىعاتىنىنا كٷمەنٸم بار. سوندىقتان جاۋاپتى باسقارما باسشىلارى بٸلٸم ۇيالارىنىڭ قۇرىلىس بارىسىن قايتا قاراپ شىقسىن. مەكتەپتەرگە كٷردەلٸ جٶندەۋ جۇمىستارى دا ٶز مەرزٸمٸندە اياقتالۋى تيٸس. قارجىعا دەر كەزٸندە ۇسىنىس بەرۋ, جۇمىس بارىسىن, مەردٸگەردٸڭ جۇمىسىن قاداعالاۋ – مٸندەتتەرٸڭٸز. ٶڭٸردە وقۋشىلاردىڭ الاڭسىز بٸلٸم الۋىنا جاعداي جاسالۋى قاجەت. بۇل باعىتتا جۇمىس جالعاسا بەرەدٸ», – دەدٸ وبلىس ەكٸمٸ.
وبلىس ەكٸمٸ ٶڭٸردەگٸ مەكتەپتەردٸڭ قۇرىلىس جۇمىستارىنىڭ مەرزٸمٸندە اياقتالۋىن قامتاماسىز ەتۋدٸ, قۇرىلىس جۇمىستارىنىڭ ساپاسىن قاتاڭ باقىلاۋدا ۇستاۋدى, كەمشٸلٸكتەردٸ جويىپ, بٸلٸم سالاسىنا قاتىستى قوردالانعان مەسەلەلەردٸ شەشۋ ٷشٸن كەزەڭ-كەزەڭٸمەن ٸس-شارالار جوسپارىن بەكٸتۋدٸ تاپسىردى. باسقارمالار ٶزارا كەڭەسٸپ, كەيبٸر مەسەلەلەردٸ ورتاق ٷيلەستٸرۋ كەرەك ەكەنٸن اتاپ ٶتتٸ. اتالعان جۇمىستارعا جاۋاپتى باسقارما باسشىلارى مەن اۋدان, قالا ەكٸمدەرٸنٸڭ تٸكەلەي جاۋاپتى ەكەنٸ ەسكەرتتٸ. كٷردەلٸ جٶندەۋدەن ٶتٸپ جاتقان مەتەپتەرگە قاتىستى بٸرقاتار ناقتى تاپسىرمالار بەردٸ. قۇرىلىستىڭ وقۋ پروتسەسٸنە كەدەرگٸ كەلتٸرمەۋٸن ەسكەرتتٸ. وبلىستا 32 مەكتەپتٸ كٷردەلٸ جٶندەۋدەن ٶتكٸزۋ ٷشٸن جالپى 4 ملرد. تەڭگەدەن استام قاراجات قارالعان. جىل سوڭىنا دەيٸن ولاردىڭ جارتىسى تولىق جٶندەۋدەن ٶتەدٸ.
