Túrli túiitkilderimen kelgen turǵyndar aimaq basshylyǵyna aryz-shaǵymdaryn tikelei betpe-bet jetkizýge múmkindik aldy. Túrkistan oblysynyń ákimi Darhan Satybaldy barlyq quqyq qorǵaý organdary basshylarynyń qatysýymen Arys pen Otyrar turǵyndaryna arnaiy baryp, biryńǵai qabyldaý ótkizdi.
Turǵyndardyń basym bóligi óńirdiń birinshi basshysynan jumysqa ornalastyrý, úi alý, meditsinalyq kómek sekildi jeke sipattaǵy máselelerin sheshýge kómek surady. Sonymen qatar áleýmettik, aýyz sý, qoǵamdyq kólik, kóshelerdi jaryqtandyrý, joldardy jóndeý, sport, aýyl sharýashylyǵy men infraqurylym salalary boiynsha birqatar ótinishteri men usynystaryn jetkizdi.
«Sizdermen júzdesip, ótinishterińizdi tyńdaýǵa arnaiy kelip turmyz. Quqyq qorǵaý organdarynyń basshylary da osynda. Keibir máselelerdi sheshý uzaq ýaqytty talap etedi. Biz osy rette qoldan kelgen múmkindikti qarastyramyz. Jergilikti deńgeide sheshiletin túitkilder de bar. Aýdan, qala ákimderine, jaýapty tulǵalarǵa eldiń ótinishteri men aryz-shyǵamyn muqiiat nazarǵa alýdy tapsyramyn», – dedi Darhan Satybaldy.
Kókeitesti máselesine bailanysty kómek surap kelgenderdiń qarasy kóp.
Suraqtardyń basym bóligi sheshildi. Turǵyndardyń talap-tilekterin muqiiat tyńdaǵan oblys ákimi kóterilgen máselelerge bailanysty jaýapty basqarma basshylaryna aitylǵan aryz-shaǵymdardy nazarǵa alyp, zań aiasynda sheshýdi tapsyrdy. «Halyq únine qulaq asatyn memleket» tujyrymdamasy men ashyqtyq qaǵidatyna sáikes ótken kezdesýde turǵyndar tarapynan ózekti máseleler qozǵaldy. Arasynda jergilikti sottardyń shyǵarǵan sheshimderimen kelispeitinder de bar. Olarǵa zańǵa sáikes, joǵary sot satylaryna shaǵym keltirý tártibi túsindirildi.
Arys qalasy men Otyrar aýdanynyń 100-den astam turǵyny kókeidegi oilary men usynys-tilekterin tolyq jetkizdi. Oblys ákimimen birge turǵyndardy QR Ulttyq qaýipsizdik komiteti Túrkistan oblysy boiynsha departamentiniń, Túrkistan oblystyq prokýratýrasynyń, QR Sybailas jemqorlyqqa qarsy is-qimyl agenttiginiń (Sybailas jemqorlyqqa qarsy qyzmet) Túrkistan oblysy boiynsha departamentiniń, Túrkistan oblysy politsiia departamentiniń, QR Memlekettik qyzmet isteri agenttiginiń Túrkistan oblysy boiynsha departamentiniń basshylary men ókilderi jáne atalǵan aýdan men qaladaǵy sot tóraǵalary, prokýrorlary, departament basshylary qabyldady.
Biryńǵai azamattardy qabyldaý kúnin ótkizýdegi basty maqsat – azamattardyń naqty áleýmettik problemalaryn sheshe otyryp, halyqpen tikelei qatynas ornatý. Ashyq esik kúnine kelgen barlyq azamat úshin qolaily jaǵdai jasaldy. Qajet bolǵan jaǵdaida meditsinalyq jáne psihologiialyq kómek kórsetý úshin mamandar jumyldyrylǵan.
Jeke qabyldaýǵa kelgen turǵyndar qoiylǵan suraqtaryna qanaǵattanarlyq jaýap aldy. Ótinishteriniń oryndalýynan úmitti. Solardyń biri – Júnisova Ásemkúl. Arys qalasy, Baiyrqum aýylynyń turǵyny meditsina máselesin kóterdi.
«Buryn aýylda aýrýhana bolǵan, sol jabylyp, ornyna ambýlatoriia salynǵan. Oblys ákiminen stantsionarly emdeý mekemesin salyp berýdi suradym. Óńir basshysy ótinishti qabyldap, máseleni qaraitynyn jetkizdi», – deidi ol.
Al Otyrar aýdanynyń turǵyny Mádi Jumabek mundai kezdesýlerdiń mańyzy zor ári jii ótýi kerek degen pikirde.
«Oblys ákiminiń qabyldaýyna jazylyp, birneshe máseleni kóterdim. Jer daýy, sport nysany men saiabaq salý jóninde el ótinishin jetkizdim. Qanaǵattanarlyq jaýap aldym. Durys qabyldady. Endi sheshý jolyn kútemiz. Basshylar eldi qabyldap, máselelerin sheshse, memleket te damidy», – deidi aýdan turǵyny.
