Túrkistan oblysynyń ákimi Darhan Satybaldy barlyq quqyq qorǵaý organdary basshylarynyń qatysýymen biryńǵai qabyldaý ótkizdi, dep habarlaidy «Ult aqparat» oblys ákimdiginiń baspasóz qyzmetine silteme jasap.
Bastama oblystyń ońtústik aýdandarynda ótti. Shardara, Jetisai jáne Maqtaaral aýdandarynyń 200-ge jýyq turǵyny kókeidegi oilaryn, usynystaryn jetkizdi. Oblys ákimimen birge turǵyndardy QR Ulttyq qaýipsizdik komiteti Túrkistan oblysy boiynsha departamentiniń bastyǵy Ábilseiit Dúisebaev, Túrkistan oblystyq prokýrorynyń orynbasary Saian Keldibekov, QR Sybailas jemqorlyqqa qarsy is-qimyl agenttiginiń (Sybailas jemqorlyqqa qarsy qyzmet) Túrkistan oblysy boiynsha departamentiniń basshysy Qanat Qojahmetov, Túrkistan oblysy politsiia departamentiniń bastyǵy Murat Qabdenov, QR Memlekettik qyzmet isteri agenttiginiń Túrkistan oblysy boiynsha departamentiniń basshysy Orken Balajanov, Túrkistan oblysynyń Qorǵanys isteri departamentiniń bastyǵy Nurmahan Dúisebaev,
Túrkistan oblysynyń ekonomikalyq tergep-tekserý departamentiniń basshysy Qairat Bektembaev,
atalǵan aýdandardaǵy sot tóraǵalary jáne departament basshylary qabyldady. Eldiń aryz-shaǵymy men ótinishterin tyńdady. Ashyq pikir almasý ótip, kúrdeli túitkilderdiń túiini tarqatyldy.
«Halyq únine qulaq asatyn memleket» tujyrymdamasy men ashyqtyq qaǵidatyna sáikes ótken kezdesýde turǵyndar tarapynan ózekti máseleler qozǵaldy. Óńir basshysy árbir usynys pen ótinish hattamaǵa engizilip, tiisti jumys júretinin aitty.
«Búgin ózderińizben júzdesý úshin arnaiy keldik. Óńirdegi barlyq basqarma men departamentterdiń basshylary, quqyq qorǵaý organdarynyń bastyqtary da osynda. Kóteriletin máselelerdi zań aiasynda sheshýge, túsindirýge keldi. Maqsat – qordalanǵan máseleler boiynsha ótinish, aryz, usynystardy tyńdaý. Barlyq sala boiynsha ótinish qabyldanady. Problemany ashyq aitýǵa múmkindikterińiz bar», – dedi Darhan Satybaldy.
Shardara, Jetisai, Maqtaaraldaǵy biryńǵai qabyldaýlarda ár túrli sebeptermen qiyn jaǵdailarǵa tap bolyp, járdem surap kelgenderdiń tizimi alynyp, sheshý joldary qaraldy. Turǵyndar tarapynan jer telimderin zańdastyrý, bilim salasy, jeke kásipkerlik salasy, áleýmettik qoldaý, bilim jáne ózge de salalar boiynsha máseleler kóterildi. Sot sheshimderimen kelispeýshilik týraly suraqtar az bolǵan joq. Barlyǵynyń sheshilý joly zań sheńberinde qaralyp, máseleler tiisti sala mamandarynyń talqylaýymen jan-jaqty saralana otyryp hattamaǵa engizildi. Jeke máselesin qozǵap kelgen turǵyndarǵa sheshim reti men zańdylyǵy túsindirildi.
Jetisai aýdanynyń turǵyny Marat Dildábekovtiń aitýynsha, osyndai ashyq dialogtyń mańyzy zor.
«Oblys ákimi Darhan Satybaldynyń qabyldaýynda bolyp, drenaj máselesin kóterdim. Qanaǵattanarlyq jaýap aldym. Ótinish boiynsha jumys júretinin, másele baqylaýǵa alynatynyn aitty. Búgingidei biryńǵai kezdesýlerdi jii ótkizip turǵan jón. Oryndy bastama. Halyqtyń aldyna basshylar ózderi kelip, aryz-shaǵymdaryn qabyldady», – deidi ol.
Eraliev aýyl okrýginiń turǵyny balabaqshalardy qarjylandyrýdaǵy kemshilikterdi aitty.
«Aýdanǵa basshylardyń keletinin estip, oblys ákiminiń qabyldaýyna jazyldym. Ótinish kedergisiz qabyldandy. Suraǵyma tiisti jaýap aldym. Kóńilim toldy», – deidi ol.
Jalpy úsh aýdan boiynsha 200-ge jýyq turǵynnyń ótinishteri qabyldandy. Turǵyndar túrli máselelerdi kóterip, basshylarmen erkin pikir almasty. Usynystar hattamaǵa engizilip, naqty jumys júredi.
