تٷركٸستان وبلىسىنىڭ ەكٸمٸ دارحان ساتىبالدى بارلىق قۇقىق قورعاۋ ورگاندارى باسشىلارىنىڭ قاتىسۋىمەن بٸرىڭعاي قابىلداۋ ٶتكٸزدٸ, دەپ حابارلايدى «ۇلت اقپارات» وبلىس ەكٸمدٸگٸنٸڭ باسپاسٶز قىزمەتٸنە سٸلتەمە جاساپ.
باستاما وبلىستىڭ وڭتٷستٸك اۋداندارىندا ٶتتٸ. شاردارا, جەتٸساي جەنە ماقتاارال اۋداندارىنىڭ 200-گە جۋىق تۇرعىنى كٶكەيدەگٸ ويلارىن, ۇسىنىستارىن جەتكٸزدٸ. وبلىس ەكٸمٸمەن بٸرگە تۇرعىنداردى قر ۇلتتىق قاۋٸپسٸزدٸك كوميتەتٸ تٷركٸستان وبلىسى بويىنشا دەپارتامەنتٸنٸڭ باستىعى ەبٸلسەيٸت دٷيسەباەۆ, تٷركٸستان وبلىستىق پروكۋرورىنىڭ ورىنباسارى سايان كەلدٸبەكوۆ, قر سىبايلاس جەمقورلىققا قارسى ٸس-قيمىل اگەنتتٸگٸنٸڭ (سىبايلاس جەمقورلىققا قارسى قىزمەت) تٷركٸستان وبلىسى بويىنشا دەپارتامەنتٸنٸڭ باسشىسى قانات قوجاحمەتوۆ, تٷركٸستان وبلىسى پوليتسييا دەپارتامەنتٸنٸڭ باستىعى مۇرات قابدەنوۆ, قر مەملەكەتتٸك قىزمەت ٸستەرٸ اگەنتتٸگٸنٸڭ تٷركٸستان وبلىسى بويىنشا دەپارتامەنتٸنٸڭ باسشىسى وركەن بالاجانوۆ, تٷركٸستان وبلىسىنىڭ قورعانىس ٸستەرٸ دەپارتامەنتٸنٸڭ باستىعى نۇرماحان دٷيسەباەۆ,
تٷركٸستان وبلىسىنىڭ ەكونوميكالىق تەرگەپ-تەكسەرۋ دەپارتامەنتٸنٸڭ باسشىسى قايرات بەكتەمباەۆ,
اتالعان اۋداندارداعى سوت تٶراعالارى جەنە دەپارتامەنت باسشىلارى قابىلدادى. ەلدٸڭ ارىز-شاعىمى مەن ٶتٸنٸشتەرٸن تىڭدادى. اشىق پٸكٸر الماسۋ ٶتٸپ, كٷردەلٸ تٷيتكٸلدەردٸڭ تٷيٸنٸ تارقاتىلدى.
«حالىق ٷنٸنە قۇلاق اساتىن مەملەكەت» تۇجىرىمداماسى مەن اشىقتىق قاعيداتىنا سەيكەس ٶتكەن كەزدەسۋدە تۇرعىندار تاراپىنان ٶزەكتٸ مەسەلەلەر قوزعالدى. ٶڭٸر باسشىسى ەربٸر ۇسىنىس پەن ٶتٸنٸش حاتتاماعا ەنگٸزٸلٸپ, تيٸستٸ جۇمىس جٷرەتٸنٸن ايتتى.
«بٷگٸن ٶزدەرٸڭٸزبەن جٷزدەسۋ ٷشٸن ارنايى كەلدٸك. ٶڭٸردەگٸ بارلىق باسقارما مەن دەپارتامەنتتەردٸڭ باسشىلارى, قۇقىق قورعاۋ ورگاندارىنىڭ باستىقتارى دا وسىندا. كٶتەرٸلەتٸن مەسەلەلەردٸ زاڭ اياسىندا شەشۋگە, تٷسٸندٸرۋگە كەلدٸ. ماقسات – قوردالانعان مەسەلەلەر بويىنشا ٶتٸنٸش, ارىز, ۇسىنىستاردى تىڭداۋ. بارلىق سالا بويىنشا ٶتٸنٸش قابىلدانادى. پروبلەمانى اشىق ايتۋعا مٷمكٸندٸكتەرٸڭٸز بار», – دەدٸ دارحان ساتىبالدى.
شاردارا, جەتٸساي, ماقتاارالداعى بٸرىڭعاي قابىلداۋلاردا ەر تٷرلٸ سەبەپتەرمەن قيىن جاعدايلارعا تاپ بولىپ, جەردەم سۇراپ كەلگەندەردٸڭ تٸزٸمٸ الىنىپ, شەشۋ جولدارى قارالدى. تۇرعىندار تاراپىنان جەر تەلٸمدەرٸن زاڭداستىرۋ, بٸلٸم سالاسى, جەكە كەسٸپكەرلٸك سالاسى, ەلەۋمەتتٸك قولداۋ, بٸلٸم جەنە ٶزگە دە سالالار بويىنشا مەسەلەلەر كٶتەرٸلدٸ. سوت شەشٸمدەرٸمەن كەلٸسپەۋشٸلٸك تۋرالى سۇراقتار از بولعان جوق. بارلىعىنىڭ شەشٸلۋ جولى زاڭ شەڭبەرٸندە قارالىپ, مەسەلەلەر تيٸستٸ سالا ماماندارىنىڭ تالقىلاۋىمەن جان-جاقتى سارالانا وتىرىپ حاتتاماعا ەنگٸزٸلدٸ. جەكە مەسەلەسٸن قوزعاپ كەلگەن تۇرعىندارعا شەشٸم رەتٸ مەن زاڭدىلىعى تٷسٸندٸرٸلدٸ.
جەتٸساي اۋدانىنىڭ تۇرعىنى مارات دٸلدەبەكوۆتٸڭ ايتۋىنشا, وسىنداي اشىق ديالوگتىڭ ماڭىزى زور.
«وبلىس ەكٸمٸ دارحان ساتىبالدىنىڭ قابىلداۋىندا بولىپ, درەناج مەسەلەسٸن كٶتەردٸم. قاناعاتتانارلىق جاۋاپ الدىم. ٶتٸنٸش بويىنشا جۇمىس جٷرەتٸنٸن, مەسەلە باقىلاۋعا الىناتىنىن ايتتى. بٷگٸنگٸدەي بٸرىڭعاي كەزدەسۋلەردٸ جيٸ ٶتكٸزٸپ تۇرعان جٶن. ورىندى باستاما. حالىقتىڭ الدىنا باسشىلار ٶزدەرٸ كەلٸپ, ارىز-شاعىمدارىن قابىلدادى», – دەيدٸ ول.
ەراليەۆ اۋىل وكرۋگٸنٸڭ تۇرعىنى بالاباقشالاردى قارجىلاندىرۋداعى كەمشٸلٸكتەردٸ ايتتى.
«اۋدانعا باسشىلاردىڭ كەلەتٸنٸن ەستٸپ, وبلىس ەكٸمٸنٸڭ قابىلداۋىنا جازىلدىم. ٶتٸنٸش كەدەرگٸسٸز قابىلداندى. سۇراعىما تيٸستٸ جاۋاپ الدىم. كٶڭٸلٸم تولدى», – دەيدٸ ول.
جالپى ٷش اۋدان بويىنشا 200-گە جۋىق تۇرعىننىڭ ٶتٸنٸشتەرٸ قابىلداندى. تۇرعىندار تٷرلٸ مەسەلەلەردٸ كٶتەرٸپ, باسشىلارمەن ەركٸن پٸكٸر الماستى. ۇسىنىستار حاتتاماعا ەنگٸزٸلٸپ, ناقتى جۇمىس جٷرەدٸ.
