Qazyǵurt aýdany halqynyń tabysyn arttyrý maqsatynda memlekettik baǵdarlamalar aiasynda jyl basynan beri 7 myńǵa jýyq adam jumyspen qamtylǵan. Sonymen qatar Memleket basshysynyń «10 myń turǵynǵa 100 turaqty jumys oryndaryn ashý» jónindegi tapsyrmasyna sáikes, aýdannyn ekonomikalyq belsendi halyq sanyna qarai 551 jańa jumys ornyn ashý josparlanyp, 829-i ashyldy. Halyqtyń tabysyn arttyrýǵa baǵyttalǵan jumystar jalǵasyn tabatyn bolady. Bul týraly aýdan turǵyndarynyń aldynda esep bergen Túrkistan oblysynyń ákimi Darhan Satybaldy málim etti.
Oblys ákimi Memleket basshysy Qasym-Jomart Toqaevtyń arnaiy tapsyrmasymen Túrkistan oblysynda «Jaily mektep» pilottyq ulttyq jobasy ázirlengenin jetkizdi. Salynatyn mektepter jańa formatta bolady. Joba sheńberinde Qazyǵurt aýdanynda úsh mektep salynbaq. Al biyl Rabat jáne Syrlysai eldi mekenderinde 200 oryndyq mektepterdi paidalanýǵa beriledi.
«Qazyǵurt aýdanyn damytý máselesi nazarda tur. Aýasy taza, tabiǵaty kórkem aimaqta aýyl sharýashylyǵy, týrizm, kásipkerlik salalaryn damytýǵa múmkindik mol. Ózderińizben arnaiy júzdesip, ótinishter men usynystardy tyńdaýǵa keldik. Basqarma basshylary da osynda tur. Erkin pikir almasýǵa daiynbyz. Jalpy aýdandy damytý baǵytynda «Aýyl – El besigi» jobasy aiasynda biyl 7 eldi mekende 14 joba iske asyrylýda. Atap aitqanda, Shanaq, Jigergen eldi mekenderinde jańadan 200 oryndyq mádeniet úilerin salýǵa, Qaqpaq, Yntaly eldi mekenderinde 2 dárigerlik ambýlatoriia salýǵa qarjy qaraldy. Jigergen, Qarjan eldi mekenderinde 21 shaqyrymdy quraityn 13 kóshege asfalt tóseledi. Jańabazar eldi mekeninde jańadan sport alańshasyn salýǵa, Shanaq, Aqjar eldi mekenderin tabiǵi gazben qamtýǵa tiisti qarajat baǵyttaldy», – dedi Darhan Satybaldy.
Óńir basshysy kezdesý barysynda qazyǵurttyqtardyń qoiǵan suraqtaryna jaýap berip, usynystaryn tyńdady. Sonymen qatar jeke qabyldaý ótkizip, jergilikti bilik ókilderi men basqarma basshylaryna qabyldaýda bolǵan azamattardyń máselelerin sheshýdi tapsyrdy.
Turǵyndar tarapynan mektep salý, jer máselesi, onomastika, aýyz sý, infraqurylymdy jaqsartý, Ógem sýyn tiimdi paidalaný jáne ózge de túitkilder boiynsha suraqtar qoiyldy.
Qazyǵurt aýdanynyń injenerlik infraqurylym júiesin damytý úshin 15 biýdjettik investitsiialyq joba júzege asyrylýda.
Aýdan turǵyndarynyń 98,6%-y nemese 100 myńnan astam adam taza aýyz sýmen qamtylǵan. Tabiǵi gazben 98,2% qamtylǵan. Yzabulaq, Shanaq jáne Aqjar aýyldaryn tabiǵi gazben qamtý boiynsha 3 joba júzege asyrylýda. Jalpy quny – 889,9 mln. teńge. Kelesi jyly paidalanýǵa beriledi.
Qazyǵurt aýdanyna issaparymen kelgen Túrkistan oblysynyń ákimi Darhan Satybaldy Qaqpaq aýyl okrýginde ornalasqan «Qarqyn – 2030» jaýapkershiligi shekteýli seriktestiginiń shujyq shyǵarý tsehyna bardy. Kásiporynnyń iri qara maldy bordaqylaý alańynyń qýattylyǵy 800 bas bolsa, bordaqylaýdaǵy mal sany – 400 bas. Et óńdeý tsehy táýligine 5 tonna shujyq ónimderiniń 60 túrin shyǵarady. Kásiporynda jalpy 100 adam turaqty jumyspen qamtylǵan. Óńir basshysy kásiporyn jumysyn oń baǵalap, kásipkerlikti qoldaýǵa basa nazar aýdarý kerek ekenin aitty.
