Biyl Túrkistan qalasynda jalpy kólemi 200 myń sh.m. asatyn 3 392 páterli 53 úidiń qurylysy júrgizilip jatyr. «Ákimshilik-iskerlik ortalyǵyndaǵy» kópqabatty turǵyn úilerdiń jai-kúii men qurylys jumystary týraly Túrkistan oblysynyń ákimi Darhan Satybaldynyń tóraǵalyǵymen ótken apparat otyrysynda talqylandy.
Turǵyn úi qurylysyndaǵy atqarylyp jatqan jumystardy Túrkistan qalasynyń ákimi Nurbol Turashbekov baiandady. Málimdeýinshe, 10 aidyń ishinde jańadan salynǵan 42 kópqabatty úi paidalanýǵa berildi. Iaǵni, jyl basynan beri nesiemen jáne kezekte turǵan 2 myńnan astam otbasy baspanaly bolyp, qonys toiyn toilady. Jyl sońyna deiin taǵy 11 kópqabatty turǵyn úi qurylysy tolyq aiaqtalady. Iańni, taǵy 725 páter paidalanýǵa beriledi.
Oblys ákimi qurylys jumystarynyń sapasyn qatań baqylaýda ustaýdy, injenerlik infraqurylym júieleriniń qurylysy men abattandyrý jumystaryn shiratýdy tapsyrdy.
«Paidalanýǵa berilgen úiler halyqtyń barlyq talaby men suranysyna sai bolýǵa tiis. Bul – óte mańyzdy. Úilerdiń ainalasyń abattandyrýǵa da basa mán berilgen jón. Balalar alańqailarynyń sapasy men qaýipsizdigi – basty nazarda. Túrkistan qalasyndaǵy qurylys jumystarynyń merziminde aiaqtalýyna qala ákiminiń jáne tiisti basqarmalardyń tikelei jaýapty», - dedi Darhan Satybaldy.
Aptalyq apparat otyrysynda oblys ákimi Darhan Satybaldy paidalanýǵa berilip jatqan úilerdi tekserip, anyqtalǵan kemshilikter boiynsha oblystyq memlekettik sáýlet-qurylys baqylaýy basqarmasy tarapynan zań aiasynda sharalar qabyldaýdy tapsyrdy. Sondai-aq qala aýmaǵyn abattandyrý, kógaldandyrý, jaryqtandyrý jáne sanitariialyq jumystardy qolǵa alyp, jandandyrýdy júktedi.
