Jeti qyryn júzege asyrsaq, Uly dalanyń ulylyǵy odan ári aiqyndalatyny anyq. QR Parlamenti Májilisiniń depýtaty Darhan Myńbai Elbasynyń «Uly dalanyń jeti qyry» atty maqalasyna orai osyndai pikir bildirdi, dep habarlaidy QazAqparat tilshisi.
«Túbin bilmegen túgin bilmeidi» demekshi, maqalada arǵy tegimizdi túgeldeitin biraz dúnie aityldy. Endigi másele aitylǵan tapsyrmalar boiynsha naqty iske kirisý. Maqalany oqi kele bir uqqanym, bizdiń tarihymyz asa bai, Prezident sol bailyǵymyzdy durys paidalanýdy ditteýde. Sebebi, Elbasy aitqandai, biz tól tarihymyzdy tolyq tanyp bilgen joqpyz. Tarihymyzdy tolyq tanimyz desek, onymen maqtanatyndai jaǵdai jasaýymyz kerek. Maqaladaǵy atalyp ótilgen jeti qyrdy júzege asyrsaq Uly dalanyń ulylyǵy odan ári aiqyndalatyny anyq», - dedi Darhan Myńbai.
Halyq qalaýlysynyń pikirinshe, maqalada aitylǵan Uly dalanyń jeti qyrynyń biri - Alataý baýraiyndaǵy alma men qyzǵaldaqty odan ári brendke ainaldyrý úshin, olardy Astanadaǵy Botanikalyq baqqa otyrǵyzý qajet. Sondai-aq, jalpy elimizdiń aýmaǵyndaǵy sirek kezdesetin ósimdikterdi de elorda tórine ákelýge bolady. Astanada halyqaralyq mańyzy bar sharalar jii ótedi. Osy turǵyda sheteldik qonaqtar otandyq brendterimizben tanysa alar edi.
«Biz biletin jeti qyrdyń astarynda myń syr bar. Júktelgen tapsyrmany el bolyp jumylyp jasaǵan jón. Óitkeni, bul barshaǵa ortaq abyroi. Túrki dúniesin jinaýdaǵy taǵy bir kóńilime qonǵany: tarihtyń shańy basqan arhiv isin ilgeriletý. Osy rette, Úkimet arhiv isi boiynsha arnaiy baǵdarlama qabyldap, ony zamanǵa sai tolyq tsifrlandyrý júiesine kóshirýi qajet. Mysaly, bizdiń túp tarihymyzǵa qatysty Armeniia arhivinde tyń dúnieler bar. Ony ekiniń biri bilmeidi, kúzek kúttirmei qolǵa alatyn dúnieniń biri - osy Armeniia arhivi. Bir eskeretin dúnie, arhiv búgin baryp, erteń alyp keletin is eme. Bul jerde memlekettik saiasat jatyr. Keide memleket basshylarynyń qatysýymen atqarylatyn sharýa», - dedi ol.
Eske salaiyq, keshe Elbasynyń «Uly dalanyń jeti qyry» atty maqalasy jariialandy. Onda ejelgi dáýirden qazirgi zamanǵa deiingi kezeńdi qamtityn barlyq otandyq jáne sheteldik muraǵattar dúniesine irgeli zertteýler júrgizý úshin «Arhiv - 2025» jeti jyldyq baǵdarlamasyn jasaý qajetti atap ótildi.
.jpeg)