Búgin QR Aqparat jáne qoǵamdyq damý ministri Darhan Qydyráli Shymkentte qalalyq Qazaqstan halqy Assambleia janyndaǵy qoǵamdyq qurylymdardyń jetekshilerimen, etnomádeni birlestikterdiń tóraǵalarymen kezdesti.
«Dostyq úii» bazasyndaǵy «Birlik alańynyń» jumysymen tanysyp, jergilikti etnos ókilderimen «dóńgelek ústel» basynda ashyq pikir almasty.
Qoǵamdyq kelisim men jalpyulttyq birlik salasyndaǵy memlekettik saiasat aiasynda birlese atqaratyn jumystarǵa toqtalǵan ministr úshinshi megapolis turǵyndarynyń berekeli birlik jolyn jalǵap otyrǵanyna alǵys aitty.
"Ulysymyzdyń uiytqysy atanǵan ońtústik jurtshylyǵy árdaiym igi isterdiń bastamashysy bolyp otyr. Qalalyq assambleia músheleri qoǵamdaǵy tuǵyrly tatýlyǵymyzdy bekemdep, qaiyrymdylyq baǵytyndaǵy jumystarǵa turaqty atsalysýda", - dedi Darhan Qýandyquly.
Jiynda Qazaqstan ózbekteri etnomádeni birlestikteri «Dýstlik» qaýymdastyǵynyń tóraǵasy, qalalyq QHA tóraǵasynyń orynbasary Ikramjan Hashimjanov qalalyq assambleianyń atqarǵan jumystaryn baiandap, ózara baýyrlastyqty nyǵaitýǵa arnalǵan is-sharalardy respýblikalyq deńgeide aqparattyq qoldaý kórsetýge shaqyrdy. Slavian etnomádeni birlestiginiń tóraiymy Natalia Romanova «Qazaqtaný» jobasy boiynsha iske asyp jatqan bastamalardy aityp, QR Aqparat jáne qoǵamdyq damý ministrligi arqyly «Qazaqtaný» arnaiy aqparattyq resýrsyn qurýdy usyndy. Túrik etnomádeni birlestiginiń tóraǵasy Latipsha Asanov investitsiia tartý, «Assambleia jastary» uiymy qalalyq ókildiginiń basshysy Nurbolat Meiirbekov jastardy qoldaý týraly sóz sóilep, usynys-pikirlerin aitty.
Assambleia múshelerin tyńdaǵan ministr ultymyzdy uiystyratyn tyń jobalarǵa memleket tarapynan árdaiym demeý bolatynyn jetkizip, etnos ókilderi arasynda memlekettik tildi damytý men «Qazaqtaný» jobasyn jańǵyrtyp, damytýǵa qoldaý bildiretinin atap ótti.
"Shymkent shyraily shahar bolýymen qatar, shuǵylaly óńir. Búginde qala aýmaǵynda turatyn etnos ókilderi berekeli birlik jolyndaǵy bastamalar aiasyna toptasyp, eldik jolyndaǵy isterge atsalysyp keledi.
Tilimiz – tatýlyqtyń tili bolýy tiis. Bul baǵytta shymkenttik assambleia músheleri ózge aimaqtarǵa úlgi bola alady", - dedi ministr.
Aita keteiik, búginde elimizdiń úshinshi megapolisi Shymkentte 1 million 112 myńnan astam halyq turady. Ulttyq quramy boiynsha turǵyndardyń 30%-dan astamyn etnos ókilderi quraidy. Qala aýmaǵynda 17 etnomádeni birlestik jáne olardyń janynda 19 shyǵarmashylyq uiym men 3 jeksenbilik mektep áreket etedi.
