Qazaqstanda kelesi jylǵy Jastar jylyna arnalǵan arnaiy jol kartasy ázirlenip, sharalardy atap ótýdiń baǵyttary aiqyndaldy. Jol kartasynyń naqty osy baǵyttary týraly Astanada ótip jatqan «Nur Otan» partiiasy bastaýysh uiymdarynyń respýblikalyq forýmynda Qoǵamdyq damý ministri Darhan Káletaev málim etti, dep habarlaidy QazAqparat tilshisi.
«Qazirgi tańda atalmysh bastamany júzege asyrý boiynsha Jol kartasy ázirlenip qoidy. Jastar jyly biz úshin óte mańyzdy ári basymdyqqa ie ekenin erekshe atap ótý kerek. Naqty mindetter de belgilendi. Iaǵni, biz aýqymdy ári syrttai sán-saltanatty sharalardan bas tartyp, Jastar jylyn - barlyq memlekettik baǵdarlamalar boiynsha týra qaǵidat negizinde jastar indikatoryn engizgimiz keledi. Bul negizgi mindet - Úkimet iske asyryp jatqan barlyq memlekettik baǵlarlama boiynsha bir jyldyń ishinde jastar indiktoryn anyqtaý kerek», - dedi Darhan Káletaev.
Ministrdiń aitýynsha, jol kartasy aiasynda jumystyń negizgi baǵyttary da aiqyndalyp qoiǵan.
«Kelesi jyly iske asyrǵymyz keletin 11 baǵytty aiqyndap aldyq. Birinshisi - jastar infraqurylymyn damytý, sodan keiingi rette bilim, jumyspen qamtý, densaýlyq, qojetimdi baspana, kásipkerlikti damytý, qarjylyq saýattylyqty arttyrý, quqyqtyq mádeniet, jemqorlyqqa tózimsizdikti arttyrý, patriotizmdi kúsheitý, daryndy jastardy qoldaý, jastardan qurylǵan úkimettik emes uiymdardy damytý jáne memlekettik jastar saiasatyn aqparatttyq turǵyda qamtamasyz etý jumystaryna mańyz beriledi. Mine, biz aiqyndap alǵan 11 baǵyt - osy», - dedi Darhan Káletaev.
Eske sala ketsek, elordadaǵy Kongress-ortalyqta «Nur Otan» partiiasy bastaýysh uiymdarynyń respýblikalyq forýmy ótip jatyr.
