Aýyl sharýashylyǵy salasyndaǵy negizgi máselelerdi ashyq talqylaý maqsatynda Túrkistan oblysynyń ákimi Darhan Satybaldy sharýalarmen kezdesti. Olardy jeke-jeke tyńdap, usynys-pikirlerin eskerdi. Basqosý barysynda aǵyn sý jetispeýshiliginen týyndaityn problemalar, aýyl sharýashylyǵy salasyn sýbsidiialaý men nesielendirý, jer máselesi, mineraldy tyńaitqyshty ýaqytyly jetkizý, maqtanyń naqty baǵasynyń belgilenýi jan-jaqty talqylandy. Sondai-aq veterinariia salasyna reforma júrgizip, derbes basqarma retinde damytýdy usyndy.
Sharýalardy alańdatqan máselelerdiń eshqaisysy nazardan tys qalǵan joq. Olardyń talabyn muqiiat tyńdaǵan Túrkistan oblysynyń ákimi Darhan Satybaldy árbir máselege jiti nazar aýdaratynyn jetkizdi. Jaýaptylarǵa birqatar mańyzdy mindetter júktedi. Maqta baǵasynyń belgilenýine orai iri zaýyt ielerimen kelisimge kelýge kiristi.
«Aýyl sharýashylyǵyna qajetti aǵyn sý máselesi sheshýde keshendi sharalar qabyldanǵan. Búgin saladaǵy qiyndyqtarmen betpe-bet kelip otyrǵan sharýalardyń únine qulaq túrip, aryz-shaǵymdaryńyz ben usynys-tilekterińizdi tyńdap, olardyń sheshý joldaryn qarastyrý úshin jinalyp otyrmyz. Máseleler belgilengen tártip pen zań aiasynda sheshiledi», – dedi Darhan Satybaldy.
Shitti maqta – toqyma ónerkásibi, mai óńdeý, gidroliz, himiia jáne basqa da salalary úshin qajetti shikizat. Elimiz boiynsha maqta ósiretin birden-bir óńir sanalatyn Túrkistan oblysynda maqta salasy negizinen eksportqa baǵyttalǵan. Sondyqtan baǵa saiasaty da syrtqy naryqtaǵy ónimge suranys negizinde qalyptasady. Jyl saiyn óńirde 70 myń tonnadai maqta talshyǵy óńdelse, ishki naryqtaǵy suranys 20 myń tonna. Óńirde óndiriletin maqta talshyǵynyń joǵary suryptary Túrkiia, Resei men Eýropaǵa eksporttalady. Maqta daqylyn ósirý úshin tyńaitqyshtarǵa memleket tarapynan sýbsidiia beriledi.
Oblys ákimi onyń der kezinde berilýin qatań qadaǵalaýdy tapsyrdy. Sonymen birge, bolashaqta maqtany oblys aýamaǵynda óńdeitin óndiris oryndaryn ashý joldaryn qarastyrýdy júktedi. Basqosýda sharýalardyń máselelerin sheshýge atsalysatyn arnaiy qaýymdastyq quryp, jer daýlaryna qatysty komissiia qurý jaily aityldy. Onyń quramyna diqandar kiredi.
50-den astam sharýany tyńdaǵan aimaq basshysy ákimdik tarapynan agroónerkásip keshenin qoldaýǵa baǵyttalǵan is-sharalardyń kezeń-kezeńimen júrgiziletinin qaperge saldy. Jáne syndarly dialog ornatý arqyly ortaq máselelerdi birlesip sheshetindigin aityp, aýdandardaǵy halyqpen kezdesý kezderinde sharýalarmen birge ortaq máselelerdi birlesip qaraitynyn jetkizdi.
