Reseilik oppozitsiialyq saiasatker Aleksei Navalnyidyń 20 jastaǵy qyzy Dariia Navalnaia Jenevadaǵy adam quqyǵyna arnalǵan belsendiler forýmynda sóiledi. Jyl saiyn BUU-nyń Adam quqyǵy jónindegi keńesiniń kezekti sessiiasy qarsańynda forým ótedi. Biyl keńestiń 47-sessiiasy Jenevada 21 maýsym men 15 shilde aralyǵynda bolady.
Seisenbi kúni Dariia Navalnaiaǵa qamaýdaǵy ákesine berilgen Batyldyq syilyǵy tabys etildi. Videomálimdemede Aleksei Navalnyidyń qyzy bylai dedi:
"Osynda men emes, ákem turýy tiis edi, biraq ol qazir Reseide túrmede qamaýda otyr. Ol búkil ómirin jemqorlyqpen kúreske arnady, sóz bostandyǵy, saiasi kózqarasty jetkizý, narazylyq bildirý quqyǵy, sailaýǵa qatysý quqyǵy siiaqty adam quqyǵy men erkindigin qorǵaýǵa kúsh saldy" dedi Navalnaia. Onyń sózine qaraǵanda, mundai mańyzdy qundylyqtar Reseide joq.
Forým uiymdastyrýshylary Aleksei Navalnyidyń áriptesi Leonid Volkovqa jibergen hatynda oppozitsionerge syilyqty "ádilet pen adam quqyǵyn qorǵaýda keremet batyldyq tanytqany úshin" berip otyrǵanyn atap ótken.
- Byltyr tamyz aiynda Navalnyi ýlaný belgileri boiynsha Omby aýrýhanasyna túsip, keiin Germaniiaǵa emdeýge jiberildi.
- Nemis zerthanasynyń sarapshylary oppozitsionerdiń aǵzasynan "Novichok" tobyna jatatyn ýdyń izderin tapty. Resei biligi Navalnyidyń ýlanǵanyn jáne ózderiniń ýlaýǵa qatysyn joqqa shyǵarady.
- Biyl 17 qańtarda Navalnyi Germaniiadan Reseige oraldy. Sheremetevo áýejaiynda ony politsiia ustady. FSIN Navalnyidyń "Iv Roshe" isi boiynsha alǵan shartty jaza erejelerin buzdy dep málimdep, ony túrmege jiberýdi surady. 2 aqpanda sot FSIN-niń ótinishin oryndady. Sot úkimine sáikes, saiasatker túrmede 2 jyl 8 ai otyrýy tiis.
