QR Densaýlyq saqtaý vitse-ministri Oljas Ábishev dárihanalar dári-dármek baǵasyn negizsiz ósirgen jaǵdaida qaida shaǵymdanýǵa bolatynyn aitty, – dep habarlaidy "Ult aqparat".
«Sońǵy ýaqytta dárihanalarda dári-dármek baǵasy kúrt qymbattap ketti degen aqparattar, fotosýretter men posttar óte kóp tarap jatyr. Osy tusta 2019 jyly tamyz aiynda QR Densaýlyq saqtaý ministrligi elimizdegi barlyq dárihanalarda kóterme jáne bólshek saýda úshin dári-dármektiń shekti baǵasyn belgileý týraly buiryqqa qol qoiǵanyn esterińizge salamyn. Búgingi tańda buiryqtyń aǵymdaǵy nusqasynda 6000-nan astam dáriniń kóterme jáne bólshek saýda baǵalary belgilengen» dep jazady vitse-ministr Facebook paraqshasynda.
Onyń aitýynsha, buiryqtyń talaptaryn saqtaý maqsatynda halyq qoldanysy úshin barlyq smartfonda jumys isteitin 3 tildi «DARIKZ» mobildi qosymshasy jasalǵan. Ol tegin qyzmet kórsetedi. Mobildi qosymshada elimizdiń dárihanalarynda shekti baǵaǵa qatysty shaǵym berý boiynsha fýnktsional bar.
«Osy fýnktsionaldyń kómegimen elimizdiń kez kelgen azamaty dárihanalarda shekti baǵa boiynsha buiryqtyń saqtalýyn tekserip, dári-dármektiń baǵasy shekti kórsetkishten joǵary bolǵan jaǵdaida shaǵym bere alady. Mobildik qosymsha arqyly berilgen barlyq shaǵymdardy QR Densaýlyq saqtaý ministrliginiń Taýarlar men qyzmetterdiń sapasy men qaýipsizdigin baqylaý komiteti qaraidy jáne buzý faktisi rastalǵan jaǵdaida Densaýlyq saqtaý ministrligi ony retteý úshin barlyq qajetti sharalardy qoldanady» deidi Oljas Ábishev.
Qosymsha arqyly shaǵym berý úshin 3 qarapaiym qadam jasaý jetkilikti:
1) Dári-dármekti shekti baǵamen tabý
2) Shaǵym berý bastyrmasyna basý jáne qajetti aqparatty engizý
3) «Jiberý» batyrmasyn basý.
Qosymshany myna siltemede júktep alýǵa bolady.
