QR Sanitarlyq-epidemiologiialyq baqylaý komitetiniń tóraǵasy Aijan Esmaǵambetova Pfizer vaktsinasy eldegi qory týraly málimet berdi, dep habarlaidy QazAqparat.
«Búgingi tańda bizde Pfizer vaktsinasynyń 2 million 400 myń dozasy bar. Byltyrǵy kelisim boiynsha 4 mln doza jetkizý kerek. Iaǵni taǵy 600 myń doza jetkiziledi. Sonda respýblika aýmaǵynda Pfizer vaktsinasynyń 3 mln dozasy bolady degen sóz. Búgingi tańda Comirnaty Pfizer vaktsinasy 12-18 jas aralyǵyndaǵy jasóspirimderge, júkti, bala emizetin áielderge salynyp jatyr. Júkti áielderdiń revaktsinatsiiasyna osy vaktsina qoldanylady. Keshe Bas sanitar dárigerdiń qaýlysy qabyldandy. Ol 60 jastan asqan adamdardy qaita vaktsinalaý úshin Comirnaty Pfizer vaktsinasyn paidalanýǵa múmkindik beredi. Óitkeni bul eń osal top jáne qosalqy aýrýlar bolǵan kezde jasyna qarai aýyr syrqattardy týdyrýy múmkin», - dep túsindirdi Aijan Esmaǵambetova.
Sondai-aq, ol Pfizer preparatymen revaktsinatsiialaý aýrýmen kúrestiń aldyńǵy shebinde júrgen jáne kún saiyn koronavirýspen aýyrǵandarmen betpe-bet jumys isteitin meditsina qyzmetkerleri saldyrýy múmkin ekenin atady.
Sondai-aq ol eldegi vaktsinanyń qory engiziletin shekteýlerge áser etpeitinin aitty.
«Pfizer vaktsinasynyń bolýy el boiynsha shekteýler engizýge áser etpeidi. Biz barlyq qoljetimdi vaktsinalarmen halyqty vaktsinalaýdy jáne qaita vaktsinatsiialaýdy jalǵastyra beremiz. Qandai da bir shekteýlerdi engizýge, birinshi kezekte, densaýlyq saqtaý júiesindegi júkteme áser etedi. Al júktemeni azaitý úshin alys-beris, pen barys-kelisti azaitý, ujymdardy oqshaýlaý, iaǵni virýstyń halyq arasynda taralýyn azaitýǵa baǵyttalǵan shekteýler engiziledi. Densaýlyq saqtaý júiesiniń múmkindikteri sheksiz emes ekenin bárimizdiń túsinýimiz kerek», - dep túsindirdi Aijan Esmaǵambetova.
