Aqmola oblysynda dárigerlerdiń kinásinen 1-shi toptaǵy múgedek bolyp qalǵan 62 jastaǵy turǵyn sot arqyly 7,5 million teńge kóleminde moraldyq ziiandy óndirip aldy, dep habarlaidy QazAqparat tilshisi oblystyq sottyń baspasóz qyzmetine silteme jasap.
Aqmola oblystyq sotynyń sýdiasy, BAQ-pen jumys úilestirýshisi Nurjamal Jumaǵulovanyń aitýynsha, aiazda úsitip alǵan eki aiaǵy aýyrǵan 62 jastaǵy er adam 2021 jyldyń 5-shi qańtarynan bastap, bes ret aýrýhanyń qabyldaý bólimine dárigerlerden kómek surap barǵan. Alaida, dárigerler oǵan kómek kórsetýden bas tartqan.
Tek sol jyldyń 9-shy qańtarynda ǵana er adam aýrýhanaǵa «COVID-19 koronavirýstyq infektsiiasy, ortasha aýyrlyq. Ilespe aýrý: bilek pen aiaq aimaǵyndaǵy tinderdiń nekrozymen úsik shalý, eki aiaqtyń ekinshi dárejeli úsýi» qorytyndy diagnozymen jatqyzyldy.
«Naýqasta jedel progressivti infektsiia jáne eki aiaǵynyń dymqyl gangrenasy damyǵany eskerilip, 2021 jyldyń 11-shi qańtarynda dárigerlerdiń keńesinde tize býynynan joǵary ampýtatsiia úshin ota jasaý týraly sheshim qabyldandy. Osylaisha, er adam tek tórtinshi kúni aýrýhanaǵa jatqyzylyp, al altynshy kúni ota jasaldy», - dedi Nurjamal Jumaǵulova.
Naýqasqa tiisti meditsinalyq kómek kórsetpegendikten, tolyq teksermegendikten, onyń jai-kúiin tolyq baǵalamaýdan, sondai-aq, 2021 jylǵy 5 jáne 7 qańtarda birneshe ret júgingen kezde aýrýhanaǵa jatqyzýdy keiinge qaldyrý jáne áreketsizdik saldarynan naýqastyń aiaǵyna ampýtatsiia jasalyp, múgedektiktiń 1-shi toby berildi. Bul saraptamalyq qorytyndymen jáne aýrýhanany jospardan tys tekserý aktisimen rastalady.
«Naýqas aýrýhanaǵa moraldyq ziiandy óteý týraly sotqa júgindi. Moraldyq ziiannyń mólsherin anyqtaý kezinde birinshi satydaǵy sot er adamnyń depressiia, qorlaý, úmitsizdik, zalal, dármensizdik, jaisyzdyq, depressiialyq kúide bolý sezimderinen kórinetin moraldyq jáne fizikalyq azapty bastan keshirgenin eskerdi jáne utymdylyq pen ádilettilik qaǵidattaryn eskere otyryp, onyń paidasyna aýrýhanadan 7 500 000 teńge mólsherinde moraldyq ziiandy óteýdi óndirip aldy. Birinshi satydaǵy sottyń sheshimimen kelispei, aýrýhana onyń kúshin joiýdy jáne talapty qanaǵattandyrýdan bas tartýdy surady. Alaida, apelliatsiialyq sottyń qaýlysymen sot sheshimi ózgerissiz qaldy, aýrýhananyń apelliatsiialyq shaǵymy qanaǵattandyrylmady», - dep tolyqtyrdy Nurjamal Jumaǵulova.
Aýrýhanany jospardan tys tekserý materialdary QR Densaýlyq saqtaý ministrligi Meditsinalyq jáne farmatsevtikalyq baqylaý komitetiniń departamentimen sheshim qabyldaý úshin Kókshetaý qalasynyń politsiia basqarmasyna jáne Aqmola oblysynyń Densaýlyq saqtaý basqarmasyna joldandy.
«Aqmola oblysy politsiia basqarmasy tergeýshisiniń qaýlysyna sáikes aýrýhananyń meditsina qyzmetkerleriniń meditsinalyq kómekti tiisinshe kórsetpegeni týraly sotqa deiingi tergeý materialy boiynsha is júrgizý toqtatyldy. Tekserý nátijeleri boiynsha qabyldaý bóliminiń kezekshi dárigerlerin tártiptik jaýapkershilikke tartý týraly dálelder usynylmaǵan. Buiryqtardyń úzindileri boiynsha hirýrgiia bólimshesiniń dárigerlerimen eńbek sharty buzyldy», - dep túiindedi Nurjamal Jumaǵulova.
