Men barsha halyqty dárigerdi barynsha qoldap, qater ústinde jasap jatqan qyzmetterine rýhani kómek berýge shaqyrar edim. Aqyn, Qazaqstannyń eńbek sińirgen qairatkeri Qasymhan Begman koronovirýspen kúresip júrgen dárigerlerge qatysty osyndai pikir bildirdi, dep habarlaidy QazAqparat.
«Osyndai qiyn-qystaý kezeńde janyn qaterge tigip, otandastarymyzdy aýrýdan aman alyp qalý jolynda talmai, tynbai qyzmet jasap jatqan dárigerlerdiń eńbegi eren. Óz otbasy, ul-qyzdaryn Allaǵa amanattap, adam janyna arasha bolyp júrgen olardyń qazirgi eńbegi qandai qurmetke bolsa da laiyq. Osyny eskerip, Prezidentimiz mańyzdy sheshim qabyldady. Qyzmet etip jatqan ornynyń, jaǵdaiynyń qaýiptiligine qarai jalaqysyna ústemaqy taǵaiyndady. Aqsha - adam janyna arashashy bola almaidy. Degenmen, bul sheshim meditsina mamandaryn sapaly jumysqa yntalandyrýdyń tóte joly», - dedi Qasymhan Begman.
Onyń aitýynsha, bul bastamany halyq jappai qýattaǵan.
«Sebebi, dál qazirgi kezeńde Alladan keiingi senerimiz de, súienerimiz de sol aq halattylar. Aýrýǵa dýshar bolǵan otandastarymyzdyń aldy aiyǵyp, óz úilerine oralýy – halyqtyń dárigerler qaýymyna degen senimin eselei túskendei.
Men barsha halyqty dárigerlerdi barynsha qoldap, jaǵymsyz pikir, jónsiz qyljaqpen jandaryn aýyrtpai, qater ústinde jasap jatqan qyzmetterine rýhani kómek berýge shaqyrar edim», - dedi ol.
Eske sala ketsek, Memleket basshysy Qasym-Jomart Toqaev koronavirýspen kúresip jatqan meditsina qyzmetkerlerine kómek kórsetý týraly tapsyrma bergen edi. Osyǵan orai Úkimet basshysy Asqar Mamin memlekettik komissiianyń otyrysyn ótkizip, onda arnaiy sheshim qabyldady. Atalǵan sheshimge sáikes meditsina qyzmetkerleri jumysynyń qaýiptiligine qarai 3-topqa bóline otyryp, olardyń jalaqysyna ústemeaqy qosylady.
.jpeg)