مەن بارشا حالىقتى دەرٸگەردٸ بارىنشا قولداپ, قاتەر ٷستٸندە جاساپ جاتقان قىزمەتتەرٸنە رۋحاني كٶمەك بەرۋگە شاقىرار ەدٸم. اقىن, قازاقستاننىڭ ەڭبەك سٸڭٸرگەن قايراتكەرٸ قاسىمحان بەگمان كورونوۆيرۋسپەن كٷرەسٸپ جٷرگەن دەرٸگەرلەرگە قاتىستى وسىنداي پٸكٸر بٸلدٸردٸ, دەپ حابارلايدى قازاقپارات.
«وسىنداي قيىن-قىستاۋ كەزەڭدە جانىن قاتەرگە تٸگٸپ, وتانداستارىمىزدى اۋرۋدان امان الىپ قالۋ جولىندا تالماي, تىنباي قىزمەت جاساپ جاتقان دەرٸگەرلەردٸڭ ەڭبەگٸ ەرەن. ٶز وتباسى, ۇل-قىزدارىن اللاعا اماناتتاپ, ادام جانىنا اراشا بولىپ جٷرگەن ولاردىڭ قازٸرگٸ ەڭبەگٸ قانداي قۇرمەتكە بولسا دا لايىق. وسىنى ەسكەرٸپ, پرەزيدەنتٸمٸز ماڭىزدى شەشٸم قابىلدادى. قىزمەت ەتٸپ جاتقان ورنىنىڭ, جاعدايىنىڭ قاۋٸپتٸلٸگٸنە قاراي جالاقىسىنا ٷستەماقى تاعايىندادى. اقشا - ادام جانىنا اراشاشى بولا المايدى. دەگەنمەن, بۇل شەشٸم مەديتسينا ماماندارىن ساپالى جۇمىسقا ىنتالاندىرۋدىڭ تٶتە جولى», - دەدٸ قاسىمحان بەگمان.
ونىڭ ايتۋىنشا, بۇل باستامانى حالىق جاپپاي قۋاتتاعان.
«سەبەبٸ, دەل قازٸرگٸ كەزەڭدە اللادان كەيٸنگٸ سەنەرٸمٸز دە, سٷيەنەرٸمٸز دە سول اق حالاتتىلار. اۋرۋعا دۋشار بولعان وتانداستارىمىزدىڭ الدى ايىعىپ, ٶز ٷيلەرٸنە ورالۋى – حالىقتىڭ دەرٸگەرلەر قاۋىمىنا دەگەن سەنٸمٸن ەسەلەي تٷسكەندەي.
مەن بارشا حالىقتى دەرٸگەرلەردٸ بارىنشا قولداپ, جاعىمسىز پٸكٸر, جٶنسٸز قىلجاقپەن جاندارىن اۋىرتپاي, قاتەر ٷستٸندە جاساپ جاتقان قىزمەتتەرٸنە رۋحاني كٶمەك بەرۋگە شاقىرار ەدٸم», - دەدٸ ول.
ەسكە سالا كەتسەك, مەملەكەت باسشىسى قاسىم-جومارت توقاەۆ كوروناۆيرۋسپەن كٷرەسٸپ جاتقان مەديتسينا قىزمەتكەرلەرٸنە كٶمەك كٶرسەتۋ تۋرالى تاپسىرما بەرگەن ەدٸ. وسىعان وراي ٷكٸمەت باسشىسى اسقار مامين مەملەكەتتٸك كوميسسييانىڭ وتىرىسىن ٶتكٸزٸپ, وندا ارنايى شەشٸم قابىلدادى. اتالعان شەشٸمگە سەيكەس مەديتسينا قىزمەتكەرلەرٸ جۇمىسىنىڭ قاۋٸپتٸلٸگٸنە قاراي 3-توپقا بٶلٸنە وتىرىپ, ولاردىڭ جالاقىسىنا ٷستەمەاقى قوسىلادى.
.jpeg)