Aqmola oblysynyń densaýlyq saqtaý basqarmasynyń basshysy Nariman Syzdyqov Shortandy kentinde gaz ballony jarylýynyń saldarynan zardap shekkenderdiń jaǵaiy týraly aitty, dep habarlaidy QazAqparat.
Basqarma basshysynyń aitýynsha, zardap shekken eki balanyń jaǵdaiy óte aýyr, deneleriniń 90 paiyzyn kúiik shalǵan.
«Bizdegi málimet boiynsha úsh adam kóz jumyp, on adam zardap shekti. Jalpy, aýrýhanaǵa 11 adam jetkizildi, onyń ishinde bir qyz bala dárigerler kórgen soń týystarynyń úiine ambýlatoriiada em qabyldaýǵa jiberildi. Tórt bala shuǵyl Nur-Sultan qalasyndaǵy №2 balalar aýrýhanasynyń anestiziia jáne jansaqtaý bólimshesine jatqyzyldy. Eki eresek adam Nur-Sultandaǵy №1 qalalyq aýrýhananyń kúiik bólimshesine ornalastyryldy. Sonymen birge, Shortandy aýdandyq aýrýhanasynda bir bala men bir áiel stantsionarlyq em qabyldaýda. Qalǵan zardap shekkender ambýlatoriialy em qabyldaýda. Jansaqtaý bóliminde jatqandardyń jaǵdaiy óte aýyr. Onda jatqan eki balanyń biri, 2009 jylǵy ul men 2012 jylǵy qyzdyń deneleriniń 90 paiyzyn kúiik shalǵan. Olar ókpeni jeldetý apparatyna qosylǵan. Kúiik bólimshesine túsken eki er adamdardyń jaǵdaiy da óte aýyr. Olardyń denesiniń 70 jáne 40 paiyzyn kúiik shalǵan», - dedi jýrnalistermen ótken brifingide Aqmola oblysynyń densaýlyq saqtaý basqarmasynyń basshysy Nariman Syzdyqov.
Basqarma basshysy atap ótkendei, jarylystan zardap shekkenderge meditsinalyq kómek kórsetý úshin sol kúni Shortandy aýdandyq aýrýhanasyna Nur-Sultan qalasyndaǵy kópbeiindi oblystyq aýrýhanadan reanematolgtar men hirýrgtar kelgen. Sondai-aq, Kókshetaý qalasynan sanaviatsiiamen quramynda balalar reanimatologtary men hirýrgtar top kelip jetken.
Eske sala ketsek, keshe Shortandy kentinde barak tipti úsh páterli úide gaz ballony jaryldy. Oqys oqiǵa týraly habarlama órt sóndirý bólimine saǵat 21:38-de kelip túsken. Órtti sóndirýge TJD-nyń 35 qyzmetkeri men 7 tehnikasy, «Jer Ana» JShS MEÓQQ-nyń 4 qyzmetkeri men 1 tehnikasy jumyldyrylǵan.
Qazirgi málimet boiynsha, úiindiniń astynan úsh adamnyń denesi tabyldy, onyń bireýi kámelettik jasqa tolmaǵan bala. Sonymen birge, túrli deńgeidegi dene kúiigimen 10 adam aýrýhanaǵa jatqyzyldy, onyń ishinde balalar bar. Keibir zardap shekkenderdiń jaǵdaiy aýyr.
