Dárigerler koronavirýs infektsiiasyn juqtyrǵan Almatydaǵy tórt naýqastyń jaǵdaiy týraly aityp berdi, dep habarlaidy QazAqparat.
«Qazirgi ýaqytta koronavirýs infektsiiasy rastalǵan diagnozy bar 4 naýqas jatyr. Olardyń úsheýiniń jaǵdaiy qanaǵattanarlyq. Bireýi ortasha aýyr jaǵdaida. Olar bekitilgen hattama boiynsha em alýda. Virýsqa qarsy jáne simptomatikalyq terapiia ýaqytynda bastaldy. Qazir olarmen qarym-qatynasta bolǵan adamdar anyqtalyp, juqpaly aýrýlar aýrýhanasyna jatqyzyldy. Qarym-qatynasta bolǵan adamdar dárigerlerdiń baqylaýynda. Olarǵa úsh saǵattyq termometriia júrgizilip jatyr. Koronavirýs juqtyrǵandarmen qarym-qatynasta bolǵan azamattardyń báriniń jaǵdaiy qanaǵattanarlyq. Temperatýralary kóterilýi nemese aýrýdyń basqa belgileri anyqtalǵan joq», - deidi dáriger Aigúl Ábdirahmanova.
Onyń aitýynsha, aýrýhanadaǵy barlyq meditsina qyzmetkeri koronavirýs infektsiiasynyń aldyn alý jáne emdeý boiynsha jumys isteýge oqytylyp, daiyndalǵan.
Mamandar koronavirýstyń taralýyna jol bermeý úshin aldyn alý sharalaryn saqtaý kerektigin eskertedi. Turǵyndarǵa halyq kóp jinalatyn oryndarǵa barýdan ýaqytsha bas tartqan jón. Sondai-aq dárigerler juqpaly dertten qorǵaný úshin qoldy sabynmen jii jýyp turýǵa keńes beredi.
Eske sala ketsek, 14 naýryzda elordada ótken baspasóz máslihatynda Densaýlyq saqtaý ministri Eljan Birtanov Qazaqstanda eki adamnyń koronavirýs juqtyrǵanyn jetkizgen edi. Kóp ýaqyt ótpei Milan qalasynan Nur-Sultanǵa kelgen taǵy bir qazaqstandyqtan koronavirýs infektsiiasy tabyldy.
Keiin Germaniiadan ushyp kelgen Qazaqstan azamatynan koronavirýs anyqtaldy.
Al búgin taǵy eki azamattyń osy dertti juqtyrǵany belgili boldy. Osylaisha bul dertke shaldyqqandar sany 6 adamǵa jetip otyr.
