Foto: t.me/POLICE_of_KZ
Premer-ministr Álihan Smaiylov Qaraǵandy oblysynda qaza bolǵan dárigerlerdiń otbasyna kóńil aityp, jol qaýipsizdigin qamtamasyz etý boiynsha tapsyrma berdi, - dep habarlaidy Tengrinews.kz.
"Keshe keshkisin Qaraǵandy oblysynda qaiǵyly jaǵdai oryn alǵanyn bilesizder. Saryshaǵan aýylynyń mańynda jol apatynan 2 dáriger qaza taýyp, 8 meditsina qyzmetkeri zardap shekti", - Premer-ministr.
Smaiylovtyń aitýynsha, "Qazaqmys" kompaniiasynyń qyzmetkerleri meditsinalyq tekserýden keiin qaityp kele jatqan.
"Qaza bolǵandardyń týystary men jaqyndaryna qaiǵyryp kóńil aitamyn. Al, zardap shekkenderdiń tezirek saýyǵyp ketýlerin tileimin. Premer-ministr keńsesine Úkimettiń taiaýdaǵy otyrystarynyń biriniń kún tártibine joldaǵy qaýipsizdik máselesin engizýdi tapsyramyn", - dedi Álihan Smaiylov.
Eske salaiyq, Qaraǵandy oblysynda jol apatynan eki dáriger qaza taýyp, "Jezqazǵan meditsinalyq ortalyǵy" JShS Balqash qalalyq emhanasynyń segiz meditsina qyzmetkeri zardap shekkeni habarlanǵan bolatyn. Dárigerler Balqash qalasyndaǵy "Qazaqmys" kompaniiasynyń jumysshylaryn profilaktikalyq qarap-tekserýden ótkizip, qaityp kele jatqan. Olar mingen avtobýs MAZ markaly júk avtokóligimen soqtyǵysyp, jol apatyna ushyraǵan.
