Koronavirýspen kúreste aldyńǵy qatarda júrgen elordanyń meditsina mamandary qala turǵyndaryn sanitarlyq-epidemiologiialyq normalardy saqtaýǵa shaqyrdy, dep habarlaidy QazAqparat.
Koronavirýspen aýrýhanaǵa túsýshilerdiń kóbeiýin eskere otyryp, meditsina qyzmetkerleri karantin rejimin saqtaý boiynsha aldyn alý sharalaryn umytpaý kerektigin eske saldy.
«Kúzde naýqas sany az boldy. Keibiri tipti virýs toqtady dep oilaǵan bolsa kerek. Biraq infektsiia túbegeili joiylǵan joq. Koronavirýs údep turǵan shaqta kún men túndi aiyra almaǵan kezimiz boldy. Ýaqytqa qarap, qai shaqta jumys isteýimiz kerektigin oilaǵan joqpyz. Koronavirýstyń kúrt órshýi men taralýynyń qaitalanýyna jol bermeýimiz kerek. Keibiri qala ishin betperdesiz aralap, sanitarlyq normalardy elemei jatqandary bar. Al biz munda kún saiyn naýqastardyń densaýlyǵy men ómiri úshin kúresip júrmiz», - deidi qalalyq juqpaly aýrýlar ortalyǵynyń dárigeri.
Statsionarda koronavirýstan emdelip jatqan Áigerim Ómirjanova aýrýhana tósegine tańylatynyna senbegenin aitady.
«Bul qaýipti virýstyń elimizge ziian tigizgenine bir jylǵa jýyq ýaqyt boldy. Osy ýaqyt ishinde men alańsyz júrip, densaýlyǵym týraly oilaǵan emespin, virýs joq dep te oiladym. Biraq ózimdi nashar sezingen sátten bastap, birden meditsinalyq kómekke júgindim. Ókinishke qarai, menen koronavirýs shyqty. Shynymdy aitsam, mundai jaǵdaiǵa tap bolamyn dep oilamaǵan edim. Bul eshqandai da ázil emes eken», - dedi A.Ómirjanova.
Esterińizge sala keteiik, qalada birqatar karantindik shekteý sharalary engizilgen. Qala turǵyndary maska rejimin, áleýmettik qashyqtyqty saqtaýy, qoldaryn antiseptikpen óńdeýi qajet. Sońǵy bir táýlikte Nur-Sultanda koronavirýstyń 91 jaǵdaiy tirkeldi. Jalpy, pandemiia bastalǵaly indet 21 576 adamnan anyqtaldy. Koronavirýstyń taralý qaýpi boiynsha elorda «qyzyl» aimaqta tur.
