«Ulttyq ǵylymi kardiohirýrgiia ortalyǵy» AQ basqarmasy tóraǵasynyń mindetin atqarýshy Mahabbat Bekbosynova koronavirýsqa qarsy dárilik preparattardy tek dárigerler taǵaiyndaýy kerektigin aitty, dep habarlaidy QazAqparat.
Onlain rejimde ótken baspasóz máslihatynda indet taralǵan kezde klinikalyq hattamalarǵa antikoagýlianttar engizilgenin, alaida el halqy osy preparattardy dárihanalardan jappai satyp alýǵa talpynǵany aityldy. «Preparattardy eshbir júiesiz túrde alýdyń saldary qandai bolady?», - dep surady tilshiler.
«Dárigerler efirde qandai da bir preparattardyń ataýyn jariialaǵanǵa qarsymyn. Sebebi muny halyq durys qabyldamaityn jaǵdailar kezdesedi. Bizdiń suhbattarymyzdy tyńdap alyp, adamdar dárihanaǵa baryp, preparattardy satyp alady. Jalpy, dárilik preparattar tek retsept boiynsha satylýy kerek. Árine, maýsym-shilde ailarynda obektivti jaǵdai boldy, sol kezde adamdar jaqyndarynyń densaýlyǵy úshin jan-jaqtan dári izdedi. Jaz kezinde preparattardyń tapshylyǵy sezilgen edi. Degenmen, kez kelgen dárilik preparattar tek dárigerdiń ruqsatymen berilgeni durys», - dedi M. Bekbosynova.
Onyń sózine qaraǵanda, koronavirýstan emdeý kezinde qandy suiyltatyn preparattardyń túrli sanattary bar.
«Naýqas aspirinniń ústine antikoagýlianttardy qabyldaǵan jáne bul jaǵdaida adamdar meditsinalyq nusqaýlardy eskermegen. Osy oraida bizge qan toqtamaýdyń túrli jaǵdaiymen patsientter kelip jatty. Adamdar meditsinalyq mekemege júgingen kezde, osynyń saldaryn túzeýge bolatynyn aitqym keledi. Eger bul preparattardy eshbir qadaǵalaýsyz qabyldai berse, onda ólim jaǵdaiyna da alyp kelýi múmkin», - dedi dáriger.
