2019 jyly 9 maýsymda ótetin kezekten tys prezident sailaýynda Senat spikeri Dariǵa Nazarbaeva óz kandidatýrasyn usynýdy josparlap otyrǵan joq. Bul týraly Nazarbaevanyń kómekshisi Sáýle Mustafaeva málimdedi, - dep habarlaidy Tengrinews.kz tilshisi.
"Joq, Dariǵa Nazarbaeva óz kandidatýrasyn usynbaidy", - dedi Mustafaeva telefon arqyly.
Saiasattanýshy Orazǵali Seltaevtyń paiymdaýynsha, basqarýshy partiia atynan Qasym-Jomart Toqaev úmitker bolady jáne memlekettik apparat oǵan qoldaý kórsetedi, dep jazady Sputnik agenttigi.
Orazǵali Seltaev Dariǵa Nazarbaeva prezidenttikke úmitker bolýy múmkin degen pikirdiń esh negiz joq dep sanaidy, sebebi jańa bilik qurylymyna aýysý jáne bekitý protsesinde oǵan basqadai ról berilgen.
"Nazarbaeva memleket basshysy bolyp sailanatyn adamnyń maqsaty men kútpegen áreketin qadaǵalap, baqylaýda ustaý úshin senat tóraǵasy qyzmetine keldi", - dep jazdy saiasattanýshy Telegram-arnasynda.
Onyń oiynsha, Dariǵa Nazarbaeva parlamenttegi bedelin arttyrýǵa kúsh jumsaidy jáne parlamenttik sailaýdan soń tómengi palatadaǵy depýtattyq korpýsta senat tóraǵasynyń adamdary kóbeiedi.
"Ortalyq bilik organdarynan góri parlamenttiń salmaǵy arta túsedi. Ol úkimet jáne prezident ákimshiligimen ózara is-qimylda teń dárejeli seriktes mártebesine jaqyndaidy. Dariǵa Nazarbaeva jeke apparattyq jáne saiasi yqpalyn belsendi arttyrady. Prezident ákimshiligi is júzinde parlamentke tikelei jetekshilik etpeidi", - deidi saiasattanýshy.
Búgin, Qazaqstan Prezidenti Qasym-Jomart Toqaev kezekten tys prezident sailaýy 9 maýsymda ótetinin málimdedi.
