Senat spikeri Dariǵa Nazarbaevanyń tóraǵalyq etýimen Parlament Senaty Biýrosynyń otyrysy boldy, dep habarlaidy "Ult aqparat" vedomstvanyń baspasóz qyzmetine silteme jasap.
Biýro otyrysynda Májilisten túsken zań jobalary Palata komitetterine bólinip berildi.
Qarjy jáne biýdjet jónindegi komitet «Qazaqstan Respýblikasynyń Ulttyq qorynan 2019-2021 jyldarǵa arnalǵan kepildendirilgen transfert týraly» zańǵa ózgeris engizý týraly» jáne «2019-2021 jyldarǵa arnalǵan respýblikalyq biýdjet týraly» zańǵa ózgerister men tolyqtyrýlar engizý týraly» zań jobalary boiynsha bas komitet bolyp belgilendi.
Halyqaralyq qatynastar, qorǵanys jáne qaýipsizdik komiteti «Qazaqstan Respýblikasynyń Úkimeti men Tájikstan Respýblikasynyń Úkimeti arasyndaǵy Óteýsiz áskeri-tehnikalyq kómek kórsetý týraly kelisimdi ratifikatsiialaý týraly» zań jobasyn odan ári pysyqtaityn boldy.
«Qazaqstan Respýblikasynyń keibir zańnamalyq aktilerine kólik máseleleri boiynsha ózgerister men tolyqtyrýlar engizý týraly» zań jobasyna Ekonomikalyq saiasat, innovatsiialyq damý jáne kásipkerlik komiteti jaýapty bolyp belgilendi.
Biýro otyrysynda Parlament Senatynyń 28 naýryzda bolatyn otyrysynyń kún tártibine Qazaqstan Respýblikasy Parlamenti Senaty depýtaty Q.Qojamjarovtyń ant berýi jáne ony Senattyń turaqty komitetiniń quramyna sailaý týraly; Senattyń Halyqaralyq qatynastar, qorǵanys jáne qaýipsizdik turaqty komitetiniń tóraǵasyn sailaý týraly máselelerdi engizý usynyldy.
Parlament joǵarǵy palatasynyń Tóraǵasy Dariǵa Nazarbaeva 4 sáýirde bolatyn otyrysta qaralatyn respýblikalyq biýdjetke túzetýlerge áriptesteriniń erekshe nazaryn aýdardy. Senat basshysy palatanyń turaqty komitetteriniń tóraǵalaryna komitet otyrystarynda osy máseleni ýaqytynda ári jan-jaqty qaraýdy tapsyrdy.
