QR Tuńǵysh Prezidenti qorynyń direktory, Parlament Senatynyń depýtaty Dariǵa Nazarbaeva jas jýrnalisterdiń basyn qosqan Jas Qalam forýmynda jastarǵa kún saiyn bilim alýdyń mańyzy týraly aitty, dep habarlaidy Baq.kz tilshisi.
«Men 55-te bolsam da óz jasymmen maqtanamyn. Kún saiyn oqimyn. Bilmeitinim bolsa, ony aitýǵa eshqashan uialmaimyn. Ministrler kelip «aqyldy» sóilei bastaidy, sol kezde olarǵa ózimniń jaqsy túsinbegenimdi eskertip, aitqysy kelgen nárseni adami túsinikti tilmen túsindirýin suraimyn. Osydan soń dialog ornai bastaidy. Ministrlik ne ákimdik beretin press-relizge qarap qalmai ári qarai túsinińizder. Eger sizder qandai da bir oqiǵa týraly habar taratýǵa barsańyzdar aldyn ala osy oqiǵa týraly aqparat jinańyzdar. Ol jerde ne týraly aitylady, ne úshin adamdardy jinap jatyr degenge jaýap alý tiis. Sebebi osyndai forýmdar, konferentsiialar, ákimderdiń turǵyndarmen kezdesýinen birinshiden, ýaqyt ketedi, adamdar jumys isteidi, logistika, qarjylyq shyǵyn bar. Sol úshin de bul ne úshin qajet, halyqqa ne beredi, ákim, ministr, onyń orynbasary ne bank tóraǵasy ne aitqysy keldi, osy suraqtarǵa jaýap alýdy aldaryńyzǵa qoiyńyzdar», - dep keńes berdi Nazarbaeva.
Senator jýrnalistikanyń óte qyzyq mamandyq ekenin aityp, osy mamandyqty tańdaǵan jastardy quttyqtady.
«Kásibi bolý úshin óz-ózińmen jumys istep, kún saiyn bilim alý qajet. Árqaisysyńyz tabysty, árdaiym oqyrmandaryńyzdyń úlken senimine ie bolasyzdar dep oilaimyn», - dep sózin túiindedi Dariǵa Nazarbaeva.
