قر تۇڭعىش پرەزيدەنتٸ قورىنىڭ ديرەكتورى, پارلامەنت سەناتىنىڭ دەپۋتاتى داريعا نازارباەۆا جاس جۋرناليستەردٸڭ باسىن قوسقان Jas Qalam فورۋمىندا جاستارعا كٷن سايىن بٸلٸم الۋدىڭ ماڭىزى تۋرالى ايتتى, دەپ حابارلايدى Baq.kz تٸلشٸسٸ.
«مەن 55-تە بولسام دا ٶز جاسىممەن ماقتانامىن. كٷن سايىن وقيمىن. بٸلمەيتٸنٸم بولسا, ونى ايتۋعا ەشقاشان ۇيالمايمىن. مينيسترلەر كەلٸپ «اقىلدى» سٶيلەي باستايدى, سول كەزدە ولارعا ٶزٸمنٸڭ جاقسى تٷسٸنبەگەنٸمدٸ ەسكەرتٸپ, ايتقىسى كەلگەن نەرسەنٸ ادامي تٷسٸنٸكتٸ تٸلمەن تٷسٸندٸرۋٸن سۇرايمىن. وسىدان سوڭ ديالوگ ورناي باستايدى. مينيسترلٸك نە ەكٸمدٸك بەرەتٸن پرەسس-رەليزگە قاراپ قالماي ەرٸ قاراي تٷسٸنٸڭٸزدەر. ەگەر سٸزدەر قانداي دا بٸر وقيعا تۋرالى حابار تاراتۋعا بارساڭىزدار الدىن الا وسى وقيعا تۋرالى اقپارات جيناڭىزدار. ول جەردە نە تۋرالى ايتىلادى, نە ٷشٸن ادامداردى جيناپ جاتىر دەگەنگە جاۋاپ الۋ تيٸس. سەبەبٸ وسىنداي فورۋمدار, كونفەرەنتسييالار, ەكٸمدەردٸڭ تۇرعىندارمەن كەزدەسۋٸنەن بٸرٸنشٸدەن, ۋاقىت كەتەدٸ, ادامدار جۇمىس ٸستەيدٸ, لوگيستيكا, قارجىلىق شىعىن بار. سول ٷشٸن دە بۇل نە ٷشٸن قاجەت, حالىققا نە بەرەدٸ, ەكٸم, مينيستر, ونىڭ ورىنباسارى نە بانك تٶراعاسى نە ايتقىسى كەلدٸ, وسى سۇراقتارعا جاۋاپ الۋدى الدارىڭىزعا قويىڭىزدار», - دەپ كەڭەس بەردٸ نازارباەۆا.
سەناتور جۋرناليستيكانىڭ ٶتە قىزىق ماماندىق ەكەنٸن ايتىپ, وسى ماماندىقتى تاڭداعان جاستاردى قۇتتىقتادى.
«كەسٸبي بولۋ ٷشٸن ٶز-ٶزٸڭمەن جۇمىس ٸستەپ, كٷن سايىن بٸلٸم الۋ قاجەت. ەرقايسىسىڭىز تابىستى, ەردايىم وقىرماندارىڭىزدىڭ ٷلكەن سەنٸمٸنە يە بولاسىزدار دەپ ويلايمىن», - دەپ سٶزٸن تٷيٸندەدٸ داريعا نازارباەۆا.
