Parlament senatynyń depýtaty Dariǵa Nazarbaeva jýrnalisterdiń is-sharaǵa qatysý tártibin qatańdatatyn úkimet josparyna bailanysty pikirin bildirdi. Nazarbaeva jýrnalistke akkreditatsiia berý tártibi týraly buiryqqa engizilmek ózgerister jobasymen áli tanysyp úlgermegenin, biraq ony qarap shyǵatynyn aitty, dep habarlaidy "Ult aqparat".
"Aldyn ala baibalam salýdyń keregi joq" dedi ol BAQ ókilderine. Jýrnalister úkimet byltyr BAQ týraly zańǵa "baspasóz quraldarynyń jaǵdaiyn qiyndatatyn" ózgerister engizgennen keiin alańdaýshylyqqa negiz baryn aitty. Dariǵa Nazarbaeva selqostyq tanyttyńdar dep jýrnalisterdiń ózin kinálady.
- Qazirgi zamanda jýrnalisterdiń aýzyn jabýǵa bolmaidy. Qazir internet arqyly sózin ashyq aitýǵa birtalai múmkinshilikter bar. Árine, jýrnalister eldiń múddesin qorǵap, olardyń pikirin úkimetke de, qoǵamǵa da jetkizedi. Al endi [BAQ týraly] zańdy aityp jatyrsyzdar, kezinde zańdy talqylaǵanda jýrnalister bizdiń jumys toptaryna kelip óz pikirin aitqan joq, tym-tyrys qaldy. Al endi qazir jýrnalisterge óte myqty qoǵam kerek... Quqyqtaryńdy qorǵaý úshin kúresýdi úirenińdershi, is bitkennen keiin oibailamai, - dedi Nazarbaeva.
Ol jýrnalisterdiń jumysyna qatysty úkimet buiryǵyna ózgerister engizý máselesine aldaǵy aptada qaita oralatynyn aitty.
Jýrnalisterdi is-sharalarǵa qatystyrý erejesin qatańdatýdy kózdeitin úkimet buiryǵynyń jobasy normativtik quqyqtyq aktilerdiń elektrondyq bazasynda 13 aqpanda jariialandy. Jobada "jiyn, otyrystar men basqa da is-sharalar ótetin ǵimaratta jýrnalisterdi ornalastyrý múmkindigi bolmaǵan jaǵdaida mekeme jýrnalisti tirkeýden bas tartýy múmkin" degen bap bar. Jýrnalist tirkeý týraly ótinishine akkreditatsiia berýshi mekemeniń ishki tártibin jáne moderator belgilegen reglamentti saqtaýǵa jazbasha kelisimin jáne jýrnalist pen BAQ arasyndaǵy kelisim-sharttyq qarym-qatynastyń baryn rastaityn qujat kóshirmesin qosyp usynýy tiis delingen. Jýrnalisti tirkeýden bas tartýǵa negiz bolatyn sebepter kóbeigen.
Qazaqstandyq kei jýrnalister úkimettiń bul jobasyna alańdaýshylyq bildirdi. Qazaqstan jýrnalisteri odaǵynyń jetekshisi Seiitqazy Mataev jobany talaptary aqylǵa simaityn ári azamattyq jýrnalistikany joiýǵa negiz bolatyn qujat dep synady.
