Senattyń Halyqaralyq qatynas, qorǵanys jáne qaýipsizdik komitetiniń tóraǵasy Dariǵa Nazarbaeva Eýropalyq odaqtyń Ortalyq Aziia jónindegi arnaiy ókili Peter Býrianmen kezdesti, dep habarlaidy joǵary palatanyń baspasóz qyzmeti.
D. Nazarbaeva Eýropalyq odaqpen yntymaqtastyq jasaý Qazaqstannyń syrtqy saiasatynyń strategiialyq baǵyttarynyń biri ekenin atap ótti. Sondai-aq, Qazaqstan Parlamenti «Qazaqstan - Eýropalyq odaq» parlamenttik yntymaqtastyq komiteti aiasyndaǵy Eýropa Parlamentimen odan ári syndarly únqatysýdy damytýǵa múdelli ekenin bildirdi.
Eýropalyq odaqtyń Ortalyq Aziia jónindegi arnaiy ókili Qazaqstanmen yntymaqtastyqty sapaly jańa deńgeige ilgeriletýge ázir ekenin aitty.
Taraptar saýda-ekonomikalyq jáne investitsiialyq yntymaqtastyqty arttyrýdyń keleshegin talqylady. D. Nazarbaeva Qazaqstan azamattary úshin viza tártibin jeńildetý qajettigin atap ótti. Senator sondai-aq Qazaqstan Úkimeti ulttyq zańnamany eýropalyq erejelerge sáikes úilestirý boiynsha birqatar keshendi sharalar qabyldaǵanyn aitty. Qazaqstan 62 memleket, onyń ishinde Eýropanyń 33 memleketiniń azamattary úshin vizasyz tártip engizdi.
Júzdesýshiler Eýropalyq odaqtyń Ortalyq Aziia jónindegi jańa strategiiasyn talqylady. D.Nazarbaeva birlesken yntymaqtastyqtyń basymdyǵy retinde bilim berý, quqyqtyń ústemdik qurýy jáne sapaly memlekettik basqarý arqyly adami kapitaldy damytý máselesin atap ótti. Sondai-aq Aýǵanstandaǵy jaǵdaidy turaqtandyrý boiynsha sharalardy iske asyrý jaiyna toqtaldy.
D.Nazarbaeva qazaqstandyq joǵary oqý oryndarynda aýǵandyq stýdentterdi 2021 jyldarǵa deiin oqytý boiynsha baǵdarlama merziminiń uzartylǵanyn aitty. Ótken jyly Eýropalyq odaq qarjylandyratyn aýǵan qyzdaryn oqytý jónindegi quny 2 mln eýro bolatyn Qazaqstan, Ózbekstan men EO úshjaqty baǵdarlamasy iske qosyldy. «Osy bilim berý jobasy Aýǵanstandaǵy áielder rólin arttyrýǵa jáne balalardyń jaǵdaiyn jaqsartýǵa, sondai-aq jalpy eldegi jaǵdaidy retteýge yqpal etedi dep sanaimyz», - dep atap ótti senator.
Senat komitetiniń tóraǵasy EO-EAEO aiasyndaǵy yntymaqtastyqtyń keleshegi týraly baiandap, qaýymdastyqtar arasyndaǵy ózara is-qimyl eki tarapqa da paidaly bolatynyn ári jahandyq ekonomikalyq daǵdarysqa jaýap berýge múmkindik beretinin atap ótti.
