Áleýmettik mańyzdy dárilik zattardyń shekti baǵasynyń buzylý faktilerin kez-kelgen azamat tirkei alady.
Bul týraly Ortalyq kommýnikatsiialar qyzmetinde ótken baspasóz máslihatynda QR DSM Taýarlar men kórsetiletin qyzmetterdiń sapasy men qaýipsizdigin baqylaý komitetiniń tóraǵasy Timýr Sultanǵaziev málim etti, dep habarlaidy QazAqparat.
Komitet tóraǵasynyń aitýynsha, qazaqstandyqtar dárilik zattardyń baǵasyn kóterý týraly DSM taýarlar men kórsetilgen qyzmetterdiń sapasy men qaýipsizdigin baqylaý komitetiniń aýmaqtyq departamentterine, elektrondyq úkimet portaly nemese «DariKz» mobildik qosymshasy arqyly júgine alady.
«Mobildik qosymsha arqyly azamattar ár preparattyń shekti baǵasyn bilip, naqty preparatqa shtrihteý júrgizip, shaǵymdy Taýarlar men kórsetiletin qyzmetterdiń sapasy men qaýipsizdigin baqylaý komitetine jibere alady», - dep túsindirdi Timýr Sultanǵaziev.
Eske sala ketsek, buǵan deiin Timýr Sultanǵaziev monitoring toptary Qazaqstanda tirkelmegen dári-dármektiń 200 túriniń satylyp jatqanyn anyqtaǵanyn málim etken edi.
