Memleket basshysynyń tapsyrmasyna sáikes quqyq qorǵaý organdary COVID-19 pandemiiasy kezeńde dárilik zattardy alypsatýmen ainalysýdyń jolyn kesý boiynsha aýqymdy is-sharalar júrgizýde, dep habarlaidy "Ult aqparat" Aqordanyń resmi saityna silteme jasap.
Atap aitqanda, elde qalyptasqan epidemiologiialyq ahýal aiasynda jekelegen preparattarǵa joǵary suranysty paidalana otyryp, naryqtyń josyqsyz qatysýshylary dári-dármekterdi bólshek saýdada ótkizý úshin belgilengen shekti baǵalarǵa qaramastan, olardy joǵary baǵamen sata bastady (qaita satý).
Aǵymdaǵy jyldyń 5 shildesi men 3 tamyzy aralyǵynda dári-dármektiń baǵasyn kóterýdiń 522 faktisi anyqtaldy. Sonymen qatar, olardy zańsyz satý men daiyndaýdyń 338 faktisi belgili boldy.
Dári-dármekter men meditsinalyq buiymdardy satý salasynda barlyǵy 869 quqyq buzýshylyq anyqtaldy, onyń ishinde 10 qylmystyq jáne 745 ákimshilik quqyq buzýshylyq anyqtaldy.
Atalǵan sannyń 742 faktisin ishki ister organdary, 111-in – Ekonomikalyq tergeý qyzmeti, 14-in – Sybailas jemqorlyqqa qarsy qyzmet jáne 2-in – Ulttyq qaýipsizdik komitetiniń Shekara qyzmeti anyqtady.
Mysaly, Ishki ister organdary Nur-sultan qalasyndaǵy dárihananyń qosalqy úi-jaiynan túrli dárilerdiń 2811 oramasyn, quiýǵa arnalǵan 2650 júieni, 400 dana betperde men 15 litr antiseptikti zańsyz satý faktisin anyqtady, al dárihananyń ózinde olar satylmaǵan.
Sybailas jemqorlyqqa qarsy is-qimyl agenttigi 7,4 mln.meditsinalyq maskany zańsyz satý faktisi boiynsha, sondai-aq, ókpeni jasandy jeldetý apparattaryn joǵary baǵamen satyp alý kezinde biýdjet qarajatyn jymqyrǵan Qostanai jáne Qyzylorda oblystarynyń densaýlyq saqtaý organdarynyń qyzmetkerlerine qatysty qylmystyq isterdi tergeýde.
Ekonomikalyq tergeý qyzmeti jalǵan dárilik zattar men meditsinalyq maqsattaǵy buiymdardy basqa taýar belgisin paidalana otyryp, zańsyz óndiristi jolǵa qoiǵan Almaty qalasynyń úsh turǵynyna qatysty qylmystyq is qozǵady. 60 myń dana kontrafaktilik 17 túrli dári-dármek tárkilendi.
Budan basqa, quqyq qorǵaý organdary dári-dármek óndirýshiler men jetkizýshilerdiń arasynda baǵaǵa qatysty sóz bailasýǵa, olardy emdeý mekemelerinen jymqyrýǵa, gýmanitarlyq kómekti satýǵa jol bermeý boiynsha is-sharalar júrgizýde.
Bul rette quqyq qorǵaý organdarynyń ózindik qaýipsizdik bólimsheleriniń jumysy atalǵan is-sharalardy oryndaý kezinde jeke quram arasynda sybailas jemqorlyq kórinisteriniń aldyn alýǵa jáne adal kásipkerlerdiń quqyqtaryn buzýǵa jol bermeýge baǵyttalǵan.
Júrgizilip jatqan jumys pen qylmystyq isterdi tergeý Qaýipsizdik Keńesi Apparatynyń erekshe baqylaýynda.
