Sońǵy eki kúnde Nur-Sultan qalasynda 15 dári-dármek alypsatarlyǵy tirkeldi. Bul týraly elorda ákimi Altai Kólginov aityp berdi, dep habarlaidy "Ult aqparat".
«Dárilik preparattar boiynsha óte kóp shaǵym túsýde. Memleket basshysynyń tapsyrmasymen quqyq qorǵaý organdarymen birlesip, alypsatarlyqtyń jolyn kesetin mobildi top qurdyq. Buǵan deiin de azamattarǵa aitqan edik, taǵy qaitalap aitaiyn, dárihanalardaǵy baǵalardyń sharyqtaýy boiynsha 109 nómirine habarlasý kerek. Mobildi top máseleniń mán-jaiyn anyqtaidy», - dedi ákim Ortalyq kommýnikatsiialar qyzmetinde ótken brifingte.
Onyń aitýynsha, dárihanalarmen bir qolǵa shekteýli túrde dári-dármek satý týraly ýaǵdalastyq ornaǵan.
«Paratsetamol bolmasa da, onyń balamalary bar. Dárilerdi kóptep satyp alýdyń aldyn alý úshin shekteýler engizildi. Aýrýdan saqtaný úshin úiip-tógip dári alatyndar bar, bul ýaqytta shyn muqtaj adamǵa dári qalmaýy múmkin. Bul sheshimdi qalalyq dárihanalarmen jáne jetkizýshilermen birlesip qabyldadyq», - dedi A.Kólginov.
Arnaiy mobildik top dárihanalarda tekserý júrgizip, sońǵy eki kúnde 15 jaǵdaidy tirkegen.
«Sońǵy eki kúnde aýqymdy suranysty paidalanyp, dári-dármekti alyp-satqan 15 jaǵdai tirkeldi. Ol úshin 8 adam jaýapqa tartylady. Onyń bireýi zańǵa sáikes jazalandy. Biz bul máseleni baqylaýǵa alamyz», - dedi A.Kólginov.
