Dárejan Ómirbaev 34-shi Tokio halyqaralyq kinofestivaliniń konkýrstyq baǵdarlamasyna qatysqan «Aqyn» filmi úshin «Úzdik rejisser» júldesin jeńip aldy. Bul týraly búgin festivaldiń jabylý saltanatynda belgili boldy, dep habarlaidy "Ult aqparat".
- Festivaldiń qazylar alqasy osy júldeni Dárejan Ómirbaevqa berdi, óitkeni bizge filmdegi rejisserdiń tek ózine tán qoltańbasy erekshe unady, - dedi qazylar alqasynyń múshesi Kris Fýdjivara (Chris Fujiwara). – Bul film poeziia týraly ǵana emes, sondai-aq osy ónerdi baǵalamaityn zamanda aqyn bolýdyń qanshalyqty qiyn ekenin kórsetetin týyndy. Búgingi kúni bul problema táýelsiz kinogerlerdiń aldynda tur desem, artyq aitqanym emes. Bul film - adamzattyń rýhani damýyna teńdessiz úles qosatyn ónerge nemquraily qaramaityn adamdardyń eńbegi, - dedi kinosynshy.
Qazaqstandyq rejisser óz sózinde «Aqyn» filmin joǵary baǵalaǵan qazylar alqasy men festival kórermenderine alǵysyn bildirip, kórkem týyndynyń naqty baǵasyn ýaqyt beretinin atap ótti.
– Bul - meniń ǵana emes, búkil túsirilim tobynyń, sondai-aq «Qazaqfilm» kinostýdiiasynyń jeńisi. Osyndai júldeler toqtamai jumys isteýge jiger beredi, kóp rahmet, – dedi Dárejan Ómirbaev.
Esterińizge sala ketsek, QR Mádeniet jáne sport ministrligi tapsyrysy boiynsha «Ulttyq kinony qoldaý memlekettik ortalyǵy» qoldaýymen Sh.Aimanov atyndaǵy «Qazaqfilm» AQ túsirgen «Aqyn» filmi Didar esimdi moiyndalmaǵan qalamgerdiń ómiri týraly baiandaidy.
Filmniń stsenariii nemis jazýshysy German Gesseniń «Avtorlyq kesh» jelisi boiynshy jazylǵan. Filmdegi basty róldi «Jigitter» tobynyń ánshisi Erdos Qanaev somdady. Kinotýyndynyń túsirilimderi Almaty qalasynda ótti. Kartinanyń qoiýshy operatory Boris Troshev, qoiýshy sýretshisi Aleksandr Rorokin. Filmniń prodiýserleri – Iýliia Kim jáne Erjan Ahmetov.
1980 jyldan beri ótkizilip kele jatqan Tokyo International Film Festival kinofestivali Halyqaralyq kinoprodiýserler qaýymdastyǵy federatsiiasynyń (FIAPF ) tirkeýinen ótken, «A» sanatyndaǵy álemdegi úzdik 15 kinobaiqaýdyń qataryna kiretin bedeldi festivalderdiń biri.
