Qazaqstan - álemdegi sporttyq derjavalardyń biri. Táýelsizdiktiń 30 jylynda qatysqan Jazǵy Olimpiadalardyń eshbirinen oljasyz oralmadyq. Ásirese, ultymyzdyń oń jambasyna keletin sport túrlerinen Qazaqstannyń bási qashanda biik turatyn.
– Qazaqstan – Táýelsiz el, keń baitaq jeri bar, beibitsúigish halqy bar, óziniń rámizderimen maqtanyp, pash etýge múmkindigi bar. Biz sportshylar álemdik arenalarda kók týymyzdy jelbiretip, Ánuranymyzdy shyrqatý úshin barymyzdy salamyz. Bul - árbir búldirshinniń armany. Meniń de armanym bolǵan. Rio Olimpiadasynda sol armanyma jettip, altyn medal iegeri atandym, – deidi boksshy Daniiar Eleýsinov.
Birneshe halyqaralyq jarystardyń jeńimpazy Daniiar Eleýsinov búginde kásipqoi boksta baǵyn synap júr. Jerlesimiz kásibi ringte eshkimge ese jibermedi. 10 kezdesý ótkizip, barlyǵynda aiqyn basymdyqpen jeńiske jetti. Táýelsizdiktiń 30 jyldyǵyna orai uiymdastyrǵaly turǵan saiysta Daniiar argentinalyq boksshymen judyryqtasady.
– Bul jekpe-jegimdi elimniń Táýelsizdigine arnaimyn. Jankúierlerdiń qoldaýy men úshin mańyzdy. Jeńiske birge jetemiz dep úmittenemin.
Qazaqstan dúnie júzinde ótip jatqan saiystarǵa qatysyp qana qoimai, óz jerinde de dúbirli dodalar ótkizip turady. Máselen 2011 jyly sol kezdegi Astana men Almatyda ótken qysqy Azia oiyndarynda jalpykomandalyq esepte birinshi oryn aldy. Al 2017 jyly Almatyda qysqy ýniversiada alaýy tutandy. Sondai-aq túrli sport túrlerinen Álem chempionattary, gran-pri týrnirleri ótkizilip turady.
El halqynyń 30 paiyzǵa jýyǵy buqaralyq sportpen ainalysady. Búginde elimizdiń iri qalalarynda jalpyhalyqtyq marafon ótkizý de dástúrge ainalǵan.
