Qazaqstandyq kásipqoi boksshy Daniiar Eleýsinov tolyqqandy álem chempiony ataný múmkindigine ie boldy – Rio-2016 Olimpiadasynyń chempiony jartylai orta salmaqtaǵy IBO belbeýi úshin judyryqtasady. Bul týraly boksshynyń menedjeri Ziia Áliev Vesti.kz saityna bergen suhbatynda aitty, dep habarlaidy Tengrinews.kz agenttigi.
"Sensatsiia bolatyn jańalyǵymyz bar. Ony barsha qazaqstandyq boks jankúierimen bólisemiz. Olimpiada chempiony Daniiar Eleýsinov biyl tarihta qalady. Ol jartylai orta salmaqtaǵy IBO tujyrymy boiynsha negizgi chempiondyq belbeý úshin judyryqtasady. Jekpe-jek 18 jeltoqsanda Nur-Sultannyń Jekpe-Jek arenasynda ótedi. Bul boks keshi Qazaqstan Táýelsizdiginiń 30 jyldyǵyna arnalǵan, elimizdiń barsha azamaty úshin baǵa jetpes syilyq bolary haq. Bul - Qazaqstannyń úzdik boksshylary judyryqtasatyn álemdik deńgeidegi boks keshi. Daniiar álem chempiony bolý úshin negizgi jekpe-jekte bar kúshin salady. IBO resmi túrde rastady. Qarsylastyń esimi jaqyn arada belgili bolady, resmi málimdeme jasaimyz", - dedi Ziia Áliev.
Eske salaiyq, 18 jeltoqsanda Nur-Sultanda úlken boks keshi ótedi. Eleýsinov kásipqoi bokstaǵy qazaqstandyq besinshi álem chempiony bolýy múmkin. Buǵan deiin Gennadii Golovkin (qazirgi – IBF, IBO), Beibit Shúmenov, Janat Jaqiianov jáne Vasilii Jirov álem chempiony atanǵan bolatyn.
