Parlament Májilisiniń depýtaty Daniia Espaeva Prezident qol qoiǵan «Qazaqstan Respýblikasyndaǵy sailaý týraly» Konstitýtsiialyq zańyna tolyqtyrýlar engizý týraly» Konstitýtsiialyq zańy men «Saiasi partiialar týraly» zańyna ózgeris pen tolyqtyrýlar engizý týraly» Zańyna qatysty pikir bildirdi, dep habarlaidy QazAqparat.
«Memleket basshysy qol qoiǵan zańdarǵa toqtalsaq, birinshi kezekte bul qujatta partiialyq sailaý tizimderinde áielder men jastar úshin keminde otyz paiyz mólsherindegi kvotany engizýge qatysty bolyp otyr. Ekinshiden, saiasi partiialardy qurý úshin qoldanystaǵy sandyq tirkeý talabyn eki ese tómendetý eskerilgen. Eger bul kórsetkish 40 myńǵa teń bolsa, endi qabyldanǵan zańǵa sáikes talaptar aitarlyqtai ózgerdi. Endi saiasi partiiany tirkeý úshin onyń quramynda jiyrma myń múshesi bolsa jetkilikti. Árine, bul qadam elimizde saiasi partiialardy qurýdy jeńildetedi. Ózderińiz bilesizder, Memleket basshysy Ulttyq qoǵamdyq senim keńesiniń ekinshi otyrysynda, tiisti birqatar usynys jasaǵan edi. Sondyqtan osyny ýaqyt aǵymy dep baǵalaǵan jón», - dedi D. Espaeva.
Osy oraida zańnamadaǵy tyń qadamdar óte mańyzdy ekenin atap ótti.
«Atap aitqanda, zańnama áielder men jastarǵa memlekettik talqylaýlar kezinde belsendi qatysýǵa múmkindik beredi. Sondyqtan endi jastar men áielderdi bul protseske jumyldyrýǵa erekshe nazar aýdarylǵan», - dedi depýtat.
«Bul der kezinde qabyldanǵan zań dep oilaimyn. Jalpy, bizde elimizdiń qoǵamdyq-saiasi ómirine belsene qatysýǵa qaýqarly áielder de, jastar da az emes. Aldaǵy ýaqytta olardyń jemisti jumysyn kóretin bolamyz», - dedi Daniia Espaeva.
Onyń paiymynsha, áielderdiń qoǵamdyq-saiasi ómirge belsendi tartylýy ońtaily nátije beredi. Óitkeni qoǵamdaǵy áleýmettik máselelerge qatysty birqatar jaǵdailardy áielder kóterýde.
«Menińshe, qazirgi jastar kreativti ári batyl. Sondyqtan biz olardyń pikirine nazar aýdarǵanymyz jón, budan Parlament pen máslihattar utady», - dedi D. Espaeva.
Budan buryn habarlanǵandai, Memleket basshysy «Qazaqstan Respýblikasyndaǵy sailaý týraly» Qazaqstan Respýblikasynyń Konstitýtsiialyq zańyna tolyqtyrýlar engizý týraly» Qazaqstan Respýblikasynyń Konstitýtsiialyq zańyna qol qoidy.
Sonymen qatar, Prezident «Saiasi partiialar týraly» Qazaqstan Respýblikasynyń Zańyna ózgeris pen tolyqtyrýlar engizý týraly» Qazaqstan Respýblikasynyń Zańyna qol qoidy.
Eske sala ketsek, 2019 jyly 20 jeltoqsanda QR Prezidenti Qasym-Jomart Toqaev Ulttyq qoǵamdyq senim keńesiniń ekinshi otyrysynda, qoldanystaǵy saiasi júieni reformalaýǵa baǵyttalǵan birqatar usynys jasaǵan edi.
Memleket basshysy partiialyq sailaý tizimderinde áielder men jastarǵa arnalǵan mindetti 30 paiyz kvotany qarastyrý jáne saiasi partiialardy qurý úshin tirkeý talabyn 40 myńnan 20 myń adamǵa deiin tómendetý qajettiligin atap ótip «biz partiialarǵa jáne sailaýǵa qatysty Zańdardy birte-birte ózgertýimiz kerek» degen bolatyn.
Budan buryn habarlanǵandai, sáýir aiynda Májilistiń jalpy otyrysynda Ádilet ministri ministri Marat Beketaev saiasi partiialardy qurý tártibi jeńildeitinin aitqan edi.
