Búgin Májilistiń jalpy otyrysynda «Qazaqstan Respýblikasynyń Parlamenti jáne onyń depýtattarynyń mártebesi týraly» Qazaqstan Respýblikasynyń Konstitýtsiialyq zańyna tolyqtyrýlar engizý týraly» Konstitýtsiialyq zańynyń jobasy maquldandy. Osyǵan orai QazAqparat tilshisi Parlament Májilisiniń depýtaty Daniia Espaevadan zań jobasyna qatysty pikirin bilgen bolatyn.
«Zań jobasyn «Aq jol» partiiasy usyndy. Biraz jyl buryn biz osy qujatty Úkimettiń qaraýyna bergen edik. Sodan beri ol EQYU baǵalaýynan ótti. Byltyr kúzde Memleket basshysy Qasym-Jomart Toqaev Ulttyq keńestiń otyrysynda Parlamenttiń kóppartiialy bolýyn aita kele oppozitsiia týraly zań jobasyn ázirleý kerektigin júktegen bolatyn. Osyǵan orai, bizdiń partiia tarapynan ázirlengen osy zań jobasyn Májilistiń qaraýyna engizdik. Búgingi otyrysta sol zań jobasy maquldanyp, Senatqa joldandy», - dedi QazAqparat tilshisine Daniia Espaeva.
Májilismen atalmysh zań jobasyna parlamenttik oppozitsiia túsinigi engizilgenin eske saldy.
«Qazirgi tańda Parlament Májilisinde 7 komitet bar. Osy komitetterdiń biriniń tóraǵalyǵyn parlamenttik oppozitsiiaǵa berý mindetti bolyp otyr. Sonymen qatar komitet hatshylyǵynyń eki orny da parlamenttik oppozitsiia múshelerine beriledi. Meniń oiymsha bul aitarlyqtai alǵa jasalǵan qadam. Batys elderinde máselen biýdjet týraly zań jobasyn, biýdjet bólinisin kóbinese oppozitsiialyq partiia qaraidy. Sol sebepti búgingi engizilgen normanyń mańyzy óte zor dep esepteimin. Jalpy bizdiń eldegi demokratiiany nyǵaitý baǵytynda jasalǵan qadam dep oilaimyn.Bul – tarihi sát. Sebebi Qazaqstanda alǵash ret parlamenttik oppozitsiia týraly zań jobasy qabyldanǵaly otyr», - dedi ol.
