Búgin Úkimet otyrysynda Shyǵys Qazaqstan oblysynyń ákimi Danial Ahmetov QR Premer-ministri Baqytjan Saǵyntaevqa óńirdegi sý basqan eldi mekenderde jumystar qalai júrgizilip jatqanyn baiandady, dep habarlaidy Baq.kz tilshisi.
Oblys ákiminiń aitýynsha, biyl shyǵysta túsken jaýyn-shashyn kólemi tómen bolǵanymen, jer tońy ótken jylmen salystyrǵanda 2 ese qalyń eken. Sonymen qatar, ol osy jyly ózenderde qatqan muzdyń qalyńdyǵy kei jerde 1 metrden asatynyn jetkizdi.
«Naýryzdyń 1-inen 25-ine deiingi aralyqta jaýǵan jańbyr qalypty normadan 3 ese artyq boldy. Qazirgi tańda oblysta 481 úidi sý basý faktisi tirkeldi. Búginde 175 úide áli sý bar. 628 úi men 110 saiajaidyń aýlasyna sý kirdi. Osyǵan qatysty joǵary deńgeili daiyndyq rejimi Óskemen jáne Semei qalasynda, Jarma, Zyrian, Kúrshim, Qatonqaraǵai, Ulan aýdandarynda engizildi. Oblystyń úsh aýdanynda Aiagóz, Glýbokoe, Shemonaihada tabiǵi sipattaǵy tótenshe jaǵdai jariialandy», - dedi oblys ákimi Úkimet otyrysynda.
Sonymen qatar Danial Ahmetov sý tasqyny saldarynan Aiagózde 14 úi qirap, 19 úidiń jaǵdaiy apatty dep tanylǵanyn málimdedi. Onyń aitýynsha, qazirgi tańda óńirdegi jaǵdai turaqty.
«286 adam úiine oraldy. Tek qana 12 adam qazirgi kezde ýaqytsha internetta turyp jatyr. Ótken 2 aptanyń ishinde 32 úi satyp aldyq. 14 úige azamattar kirdi. 2-3 kúnniń ishinde qalǵan 18 úige kisiler kiredi. Búgin men sol jaqqa taǵy da baramyn. Qurylysshylarmen birge barlyq 140 úidiń jóndeý jumystaryna baqylaý jasap, ony bir aidyń ishinde júzege asyramyz. Qazirgi tańda biz osy aýdanǵa 259 mln teńge bóldik. Barlyq jóndeitin úidiń jobalyq-smetalyq qujattamasy daiyn», - dedi ol.
Keiin oblys ákimi Glýbokoe aýdany men Progress, Beloýsov aýyldaryndaǵy jaǵdai turaqty baqylaýǵa alynǵanyn atap ótti.
«Adamdardy qaýipsiz jerge kóshirý boiynsha tiisti sharalar qabyldandy. Jalpy 172 úige sý kirgen. 567 adam sý basý qaýpi bar aimaqtan qaýipsiz jerge kóshirildi. Olardyń ishinde 53 adam úsh mektep internatqa ornalastyryldy. Úsh merzimdi tamaq jáne basqa da máseleler sheshilgen. Qalǵan turǵyndar óz týystarynyń úiine ýaqytsha kóship bardy. Qazir arnaiy komissiia qurylyp, zardap shekken úilerdi aralap júr. Biz komissiia sheshimin basshylyqqa alyp, shyǵyndy óteimiz. Qaiyrymdylyq qoryna 50 mln teńge berdik», - dedi Danial Ahmetov.
Keiin ol sý basqan Shemonaiha aýdanyndaǵy jaǵdaiǵa toqtaldy.
«Shemonaiha aýdanynda ózim boldym. Qazirgi tańda onda jaýyn sýy taýdaǵy qar sýymen aralasyp, Oba ózeniniń deńgeii 1,5 metrge kóterildi. Ol jaǵdai men sol jerde bolǵan kezde boldy. Saldarynan ózen muzy qozǵalyp, seń júrdi. Aita ketý kerek, ózen muzyn der kezinde jarmaǵanda apat saldary munan da birshama qiyn bolar edi. Sondyqtan bul jumys jalǵasyp jatyr. Aýdanda 42 úige sý kirgen. Qazir barlyq kisi úilerine oraldy. Tiisti komissiia jumys istep jatyr. Arnaiy qor ashý boiynsha sharalar qabyldandy. Búgin osy aýdanǵa taǵy da 50 mln teńge bólemiz. Barlyq másele baqylaýda», - dedi oblys ákimi.
Sóz sońynda Danial Ahmetov oblystaǵy jaǵdai táýlik boiy baqylaýǵa alynǵanyn, jedel sharalar qabyldanyp atap ótti.
