Óskemenge jýyqta jańa basshy taǵaiyndalady. Bul jóninde keńeitilgen ákimdik májilisinde Shyǵys Qazaqstan oblysynyń ákimi Danial Ahmetovtiń ózi aitty, dep habarlady Altainiýs.
"Sizderdiń aldaryńyzda ashyq aitqym kelgen taǵy bir jait, ol biylǵy sáýirde Ridder qalasynda sheneýnikterdiń jol-kólik oqiǵasyna ushyraýyna qatysty másele. Bul oqiǵa osy ýaqytqa deiin qoǵamda jii talqylanyp, BAQ-ta jetkilikti jazyldy. Oqiǵaǵa kináli Ridder qalasy ákiminiń orynbasary Baýyrjan Qurmanbaev tiisti jazasyn alyp, sottaldy. Sonymen qatar, Ridder qalalyq ishki ister basqarmasynyń birqatar basshylyq qyzmettegi jáne qatardaǵy politseileri de qyzmetterimen qosh aitysty. Oqiǵaǵa qatysy bar sheneýnikterdiń isi Ádep keńesinde qaraldy. Sondyqtan osynyń bárin tarazylai kele, men Óskemen qalasynyń ákimi Qýat Tumabaevqa osyndai jaǵdaidan keiin joǵary basshylyq qyzmette qala almaitynyn, oǵan moraldyq quqyǵy joqtyǵyn, óz erkimen jumystan ketý týraly aryz jazýy kerek ekenin aittym. Sondyqtan, aldaǵy ýaqytta oblys ortalyǵy – Óskemen qalasynda jańa ákim taǵaiyndalady", – dedi Danial Ahmetov.
Esterińizge sala keteiik, Ridderde 19 jasar Evgenii Smolnikovty kólikpen qaǵyp óltirgen Ridder qalasy ákiminiń orynbasary Baýyrjan Qurmanǵalievtiń qasynda Qýat Tumabaev otyrǵany anyqtalǵan bolatyn. Ol kýáger bolsa da, halyq aldynda oqiǵadan keiin abyroiy tómendep, oǵan qatysty syn aitýshylar kóbeiip ketti.
