Almatydaǵy túngi klýbtardyń birinde 27 jastaǵy jas jigit pen eki er adam arasyndaǵy janjal tóbeleske ulasqan. Tóbeles saldarynan olardyń biri aýyr jaraqat alyp, komadan bir-aq shyqty. Bir qyzyǵy, tergeý men sot aiyptalýshyǵa qandai bap boiynsha jaza taǵaiyndaryn sheshe almai otyr, dep jazady NUR.KZ portaly "Vremia" basylymyna silteme jasap.
Istiń qaralyp jatqanyna úsh aidan asqan. "Vremia" gazetiniń jazýynsha, 27 jastaǵy Abylai Ábdirasyl klýbqa boijetkendi ertip kelgen.
Dál sol ýaqytta klýbta "NSK" saqtandyrý kompaniiasy tóraǵasynyń orynbasary Erjan Balabekov pen qazaqstandyq jas ánshi Daneliia Tóleshovanyń ákesi Aleksandr Tóleshov te bolǵan.
Basylymnyń málimetinshe, Tóleshov pen Balabekov bileý alańyndaǵy qyzdarǵa, onyń ishinde Ábdirasyldyń qyzyna da qyryndai bastaǵan. Qyzdar olardyń bul qylyǵyn jaqtyrmai, aralarynda janjal týyndaǵan.
Janjal kezinde, er adamdar qyzdardyń biriniń shashy men qolynan ustap alǵan, dep jazady basylym.
Osy kezde Ábdirasyl Balabekovke jaqyndap, bir nárse aita bastaǵan. Artynsha, ekeýiniń arasynda tóbeles bastalyp ketken.
Basylymnyń málimetine súiensek, Balabekov qatty soqqydan edenge basymen qulaǵan. Oǵan kómekke umtylǵan Tóleshov te betinen soqqy alǵan. Ábdirasyl osy kezde mekemeden tez arada shyǵyp ketipti. Al zardap shekken tarapqa jedel járdem shaqyrǵan.
Dárigerler Balabekovke aýyr bas súiek-mi jaraqaty diagnozyn qoiyp, ota jasap, ómirin ajaldan arashalap qalǵan.
Oǵan ekijaqty bas-súiek trepanatsiiasy jasalǵan. Odan bólek, dárigerler oǵan "kóptegen kontýziialyq oshaqtary bar aýyr dárejedegi mi jaraqaty", "sýbdýraldy qatparly miǵa qan quiylý", "bas miy isinýi", "jelke súieginiń synyǵy" syndy diagnozdar qoiyp, ózge de jaraqattar alǵanyn anyqtaǵan.
Sot-meditsinalyq saraptamanyń qorytysyna sáikes, Balabekovtiń densaýlyǵyna aýyr zaqym kelgeni, al jaq súiegi synǵan Tóleshovtiń densaýlyǵyna orta dárejedegi zaqym alǵany belgili bolǵan.
Osy derekterge súiengen tergeý sotqa qylmystyq isti eki bappen – QR Qylmystyq kodekstiń 106-shy jáne 107-shi baptarynyń birinshi bóligi boiynsha joldaǵan.
Birinshi bap boiynsha kúdikti 3-ten 8 jylǵa deiin, al ekinshi bap boiynsha 2 jylǵa deiin bas bostandyǵynan aiyrylýy múmkin edi. Alaida zardap shegýshi tarap kúdiktiniń is-áreketin 106-baptyń ekinshi bóligine – buzaqylyq nietpen jáne airyqsha qatigezdikpen densaýlyqqa qasaqana ziian keltirý boiynsha saralaý týraly ótinish bergen. Bul jaǵdaida aiyptalýshy 6-10 jylǵa bas bostandyǵynan aiyrylýy múmkin.
Basylymnyń jazýynsha, Medeý aýdandyq soty zardap shekken taraptyń ýájimen kelisip, olqylyqtardy joiý úshin isti prokýratýraǵa keri qaitarǵan. Alaida prokýratýra Medeý aýdandyq sotynyń aldyn ala qaýlysynyń kúshin joiyp, isti birinshi instantsiiadaǵy sotqa qaita joldaǵan.
Is taǵy bir sýdianyń qaraýyna túsip, ol zardap shegýshi taraptyń ýájderin taǵy da ońdy dep sheshken. Prokýratýra joǵarydaǵy instantsiiaǵa qaita júgingenimen, qalalyq sot bul joly aýdandyq sýdianyń qaýlysyn óz kúshinde qaldyrdy. Sóitip, isti prokýratýraǵa keri qaitaryp otyr. Al 27 jastaǵy Abylai bolsa búginde tergeý izoliatorynda.
