Senat Tóraǵasy Máýlen Áshimbaev otandyq biznesti qoldaý tetikterin qaita retteý qajet ekenin aitty. Ol óziniń damýyn toqtatqan, tek memlekettik qoldaýdyń arqasynda ǵana kún kórip otyrǵan kompaniialardy naryqtyq ekonomikany ilgeriletýge kedergi keltirip otyrǵan basty sebepterdiń biri retinde atady. Bul jóninde Palata Spikeri búgin Senat otyrysynda málimdedi, dep habarlaidy "Ult aqparat".
Atalǵan is-sharada depýtattar biznesti júrgizý jáne qoldaý máseleleri jónindegi zańdy qaraǵan bolatyn.
Máýlen Áshimbaev atap ótkendei, Qazaqstanda biznesti damytý úshin Dúniejúzilik banktiń jýyrdaǵy baiandamasynda jariialanǵan birneshe júieli máselege nazar aýdarǵan jón.
«Jaqynda Dúniejúzilik banktiń «Qazaqstan ekonomikasy týraly» atty zertteýi jariialandy. Sol jerdegi bizdiń ekonomikamyz, onyń ishinde biznestiń jaǵdaiy tereń taldanǵan bólimder bárimizdiń qyzyǵýshylyǵymyzdy týdyrady dep oilaimyn. Naqty aitqanda, 2012 jyldan 2022 jylǵa deiingi on jyl ishinde bizde ónimdiliktiń ósýi is júzinde bolmaǵany jazylǵan. Zertteýde tiisti derekter de keltirilgen. Menińshe, Úkimet ol málimetterdi zerdeleýi kerek. Ekinshiden, 10 jyl ishinde JIÓ-ge qatysty kapital salymdary, iaǵni negizgi quraldardy satyp alý shyǵyndary 26 paiyzdan 23 paiyzǵa deiin azaiǵan», – dedi Senat Tóraǵasy.
Mundai jaǵymsyz saldarlar damymaityn, tabys ákelmeitin jáne naryqta jańa oiynshylardyń alǵa jyljýyna kedergi keltirip, memlekettik qoldaý esebinen ǵana kún kóretin kompaniialardyń ósýine alyp keledi. Sondyqtan Máýlen Áshimbaev ósýge, ónimdilikti arttyrýǵa, innovatsiialyq tehnologiialardy engizýge umtylatyn kompaniialarǵa ǵana memlekettik qoldaý kórsetý qajet ekenin aitty.
«Ikemsiz memlekettik qoldaý, onyń ishinde «Damý» arqyly aýyl sharýashylyǵyna beriletin sýbsidiialar elimizde zombi-kompaniialardyń kóptep paida bolýyna alyp keldi. Olar memlekettiń arqasynda ǵana «aman» júr. Al, ózderi esh damymaidy, alǵa jyljymaidy. Qalypty naryqtyq ekonomikada kompaniialardyń startap, qalyptasý, jetilý, keibir tehnologiialardy engizý siiaqty ómirlik tsikli bar. Soǵan bailanysty olar múmkindik bolsa, ári qarai damidy, bolmasa, jabylady. Iaǵni, bizde bul tsikl buzyldy. Bizde naryqqa jańa kompaniialar kóp kire bermeidi. Al, «eski» kompaniialar naryqtan ketpeidi. Biz bul týraly birneshe ret aittyq. Biznesti qoldaý tiimdi, ikemdi, nátijeli bolýy kerek. Sondyqtan biznesti qoldaý tetikterin qaita retteýdiń mańyzy zor. Bul rette bankrotqa ushyraý da ekonomikany tazartý, jańa kompaniialardyń paida bolýy turǵysynan bir mehanizm ekenin eskergen jón. Odan qoryqpaý kerek. Bul qalypty naryqtyq ekonomikanyń bir elementi», – dedi Máýlen Áshimbaev.
Aita keteiik, búgin Senat otyrysynda depýtattar «Qazaqstan Respýblikasynyń keibir zańnamalyq aktilerine biznes júrgizý máseleleri boiynsha ózgerister men tolyqtyrýlar engizý týraly» zańdy birinshi oqylymda qarady. Bul qujat tiisti zańnamany qoǵam men biznestiń múddelerin eskere otyryp jetildirýdi kózdeidi.
