«Damý» qoryn «aldamaq bolǵan» kásipkerler jaily Ortalyq kommýnikatsiialar qyzmetinde ótken baspasóz máslihatynda «Damý» qorynyń basqarma tóraǵasynyń orynbasary Farhat Sársekeev aityp berdi, dep habarlaidy QazAqparat.
«2019 jyly qarajatty maqsatsyz 20 qaryz alýshy paidalanǵan. Ekonomika salasy boiynsha bergen ótiniminen tys biznes bastamaq bolǵan 15 qaryz alýshy anyqtaldy. Sol sekildi jumys oryndaryn ashyp, salyq tóleý jaǵynan mindettemelerin oryndai almaǵandar kezdesti», - dedi Farhat Sársekeev.
Onyń aitýynsha, 2019 jyly bankter men mikronesielik uiymdarǵa taldaý jasalǵan.
«Bizdiń qaryz alýshylardan qarajatty maqsatsyz paidalaný boiynsha 2,2 mlrd teńge qaitaryldy. Keide qarajatty maqsatsyz paidalaný jaǵdaiy kezdesedi. Máselen, bir ótinish iesi mektep nemese balabaqsha salýǵa ótinim berip, onyń nysany qurylys barysynda ol meiramhanaǵa nemese dámhanaǵa ainalyp ketýi múmkin. Alaida memlekettik qoldaý turǵysynan meiramhana nemese dámhana basymdyqqa ie sala emes. Tiisinshe, mundai jaǵdaida ótinish iesine bas tartýǵa týra keledi. Sebebi, memleket basymdyqqa ie salalardy bekitip qoiǵan», - dedi ol.
Farhat Sársekeev memleket basymdyqqa ie salalardy bekitýiniń óz sebebi baryn aitady.
«Máselen, taýardy sheksiz importtai bermei, óz elimizde óndirilýi kerekti ónimderge jeńildetilgen nesie beriledi. Alaida kásipkerlerdiń jobany júzege asyrý barysynda josparlary ózgerip ketetin kezder bolady. Mundai jaǵdaidy, álbette, biz qarajattyń maqsatsyz paidalanýyna jatqyzamyz», - dedi ol.
