Búgin Premer-Ministr Álihan Smaiylovtyń tóraǵalyǵymen ótken Daǵdarysqa qarsy sharalar jónindegi jedel shtabtyń kezekti otyrysynda keden salasyndaǵy máseleler qaraldy, dep habarlaidy "Ult aqparat" primeminister.kz saityna silteme jasap.
Kedendik-logistikalyq infraqurylymdy damytý boiynsha qabyldanyp jatqan sharalar týraly QR qarjy birinshi vitse-ministri M. Sultanǵaziev baiandady.
Qarjy ministrliginiń Memlekettik kirister komitetiniń aqparatyna sáikes, búgingi tańda QHR-men shekaradaǵy «Altynkól» jáne «Dostyq – Temirjol» temirjol ótkizý pýnktteri shtattyq rejimde jumys istep tur.
«Qazirgi tańda 5 avtojol ótkizý pýnktiniń 4-i ashyq jáne júkterdi qabyldap jatyr. “Qaljat” ótkizý pýnkti búginde epidemiologiialyq ahýalǵa bailanysty QHR jaǵynan jabyq tur. Taraptar Qaljat-Dýlaty qyzmetin qaita bastaityn naqty kúnderdi kelisip jatyr», — dedi QR qarjy birinshi vitse-ministri.
Úkimet QHR-dan QR-ǵa «Nur joly» ótkizý pýnktinde júkterdi aýystyryp tieý máselesin sheshti, al elektrondyq kezek retke keltirilip jatyr. Bul oraida júk tasý qyzmetiniń aqysy 2 ese tómendeidi.
Keńes barysynda QR Premer-Ministri qazirgi jaǵdaiǵa bailanysty týyndaityn jáne bolýy yqtimal syn-tegeýrinderge jedel den qoiý qajettigin atap ótti.
Daǵdarysqa qarsy sharalar jónindegi jedel shtabtyń kelesi otyrysy 9 naýryzda ótedi.
